वीज बिलासाठी शेतकऱ्यांची पिळवणूक नको

खंडाळा : शेतकऱ्यांच्या शेतीपंपाच्या वीजबिलासाठी तगादा लावू नये, शेतकऱ्यांना सहकार्य करून शेतीपंपाचे ट्रान्सफार्मर दुरुस्त करण्यात यावेत, अशी मागणी खंडाळा तालुका शेतकरी कामगार पक्षाच्यावतीने करण्यात आली.

याबाबत खंडाळा उपविभागीय वीज वितरण कार्यालयात उपअभियंता विलास शिर्के यांना दिलेल्या निवेदनात म्हटले आहे की, महाराष्ट्र राज्य विद्युत वितरण कंपनी मर्यादितचे कंपनीचे

संचालक यांच्या पत्राच्या अनुषंगाने तालुक्यातील शेतकऱ्यांच्या थकीत वीजबिलाकरिता सहकार्य करावे. गतवर्षी कोरोना संसर्गजन्य रोगाच्या प्रादुर्भावामुळे व अवकाळी पावसामुळे शेतकऱ्यांच्या पिकाचे नुकसान झाले असून, शेतकरी आर्थिक अडचणीत आहेत. कंपनीचे कर्मचारी शेतकऱ्यांना शेतीपंपाच्या वीज बिल भरण्याकरिता वारंवार तगादा लावत आहेत; मात्र ऊर्जा मंत्रालयाच्या पत्रानुसार वीज बिलाची रक्कम शेतकऱ्यांकडून पुढील आदेश निघण्यापर्यंत घेण्याचे थांबवावे, अशा आशयाचे पत्र आहे. त्या अनुषंगाने शेतकऱ्यांना वीज बिलाची रक्कम भरण्याची सक्ती करू नये आणि शेतीपंपासाठी जे ट्रान्सफार्मर नादुरुस्त अवस्थेत आहेत, ते तत्काळ दुरुस्त करण्यात यावेत. त्याकरिता शेतकऱ्यांना थकीत वीजबिलापोटी काही ठराविक रक्कम भरण्यासाठीचा तगादा लावू नये. संविधानिक व लोकशाहीच्या मूल्यांचे रक्षण करून सहकार्य करावे, असेही म्हटले आहे.

शेतकरी कामगार पक्षाचे तालुकाध्यक्ष दत्तात्रय जाधव, शरद ओव्हाळ, गणेश जाधव, प्रदीप सराटे, उत्तम जाधव, अब्दुल सत्तार, रमेश भोसले यासह प्रमुख कार्यकर्ते उपस्थित होते.