पाचवडमधील व्यापाऱ्यांना ‘बांधकाम’कडून नोटिसा

सर्व प्रकारची अतिक्रमणे हटविण्यात येणार

पाचवड : पाचवड-वाई रस्त्यावरील सार्वजनिक बांधकाम विभागाच्या हद्दीत करण्यात आलेली सर्व प्रकारची अतिक्रमणे हटविण्यात येणार असून, अतिक्रमण केलेल्या सर्व व्यावसायिक व मिळकतधारकांना बांधकाम विभागाच्या वतीने नोटिसा पाठविण्यात आल्या आहेत.
या नोटिसीनुसार व्यावसायिक व मिळकतधारकांना सात दिवसांमध्ये स्वत:हून अतिक्रमणे काढण्याची सूचना केली आहे. दिलेल्या मुदतीत अतिक्रमणे न हटविल्यास सार्वजनिक बांधकाम विभाग स्वत:हून अतिक्रमणे काढणार आहे. या कारवाईमुळे वर्षानुवर्षे अतिक्रमीत झालेल्या जागा आता मोकळ्या होणार असून, या रस्त्यावर होत असलेली वाहतूक कोंडीची समस्या दूर होणार आहे.
पाचवड-वाई रस्त्यावरील अतिक्रमणे हटविल्यानंतर आठवडे बाजाराचा प्रश्न, वाहन पार्किंग सुविधा, सांडपाणी व गटारांची व्यवस्था असे अनेक प्रश्न सुटणार आहेत. (वार्ताहर)