एकेक पत्ता आता होऊ लागला ‘ओपन’

कऱ्हाड दक्षिणेत रंंगत : अनेकांची भूमिका उघड

प्रमोद सुकरे - कऱ्हाड -पत्त्यांच्या डावाप्रमाणे राजकारणाच्या डावातही सारी पत्त्याची पाने एकाच वेळी ‘ओपन’ करायची नसतात म्हणे! पण निवडणुकीचा प्रचार रंगात आणि अंतिम टप्प्यात आला, की खेळाडूंची चाल सुरू होते़ त्यानंतर एक-एक पत्ते ‘ओपन’ होऊ लागतात़ कऱ्हाडच्या राजकारणातही आता तसेच घडू लागले आहे़
कऱ्हाड दक्षिण मतदारसंघातील तीनपानी डाव सध्या सर्वांचे लक्ष वेधून घेत आहे़ यात आमदार विलासराव पाटील-उंडाळकर जुने मुरलेले खेळाडू आहेत़, तर माजी मुख्यमंत्री पृथ्वीराज चव्हाण या खेळात माहीर आहेत़ नवख्या असणाऱ्या अतुल भोसलेंनीही या डावात इतर दोघांना चांगलाच शह देण्याचा प्रयत्न चालवलाय़ त्यामुळे हा डाव कोण जिंकणार, हे महत्त्वाचे आहे़
प्रमुख प्रतिस्पर्धी असणाऱ्या या तिन्ही खेळाडूंकडून सध्या रोज एक-एक पत्ते ओपन केले जात आहेत़ एखादं पान चांगलं निघालं की मग त्याची चर्चा सर्वत्र होताना दिसतेय़ पृथ्वीराज चव्हाण यांच्याबरोबर शहरात जनशक्ती आघाडीचे बहुतांश नगरसेवक आहेत; पण गेल्या आठवड्यात राष्ट्रवादीकडून भरलेला उमेदवारी अर्ज मागे घेत उपनगराध्यक्ष राजेंद्र यादव आपल्या गटाच्या नगरसेवकांसह चव्हाण गटाकडे ओपन झाले आणि कार्यकर्त्यांच्यात जोश आला़ हणमंतराव पवार दिसेनात, अशी चर्चा होती; पण मंगळवारी माजी मंत्री सतेज पाटील यांच्या सभेला त्यांनी हजेरी लावली आणि संभ्रम दूर झाला़
भाजपमध्ये प्रवेश केलेले नगरसेवक विक्रम पावसकर उमेदवारी कापल्याने नाराज होते़ त्यानंतर विनोद तावडे यांच्या मलकापूर येथे प्रचारसभेस पत्रिकेवर नाव असतानाही ते अनुपस्थित होते. त्यामुळे उलटसुलट चर्चा सुरू झाल्या खऱ्या; पण केंद्रीय मंत्री नितीन गडकरींची नुकतीच कऱ्हाडात सभा झाली आणि विक्रम पावसकर यांनी आपले वडील नगरसेवक विनायक पावस्कर यांच्यासह हजेरी लावली़ याशिवाय आ. बाळासाहेब पाटील यांच्या गटाचे जयवंत पाटील व आप्पा माने या नगरसेवकांच्या चेहऱ्यावरही कमळ फुलल्याचे दिसले़ आमदार उंडाळकरांच्या प्रचारात सध्या तरी नगरसेवक प्रमोद कदम एकटेच दिसताहेत़ याशिवाय अनेक माजी नगरसेवकांचाही भाव सध्या वधारलाय़ त्यामुळे उरलेल्या काळात अधिकाधिक पत्ते ओपन होणार, असे दिसते.

अन् पत्ता कट झाला
मलकापूर नगरपंचायतीत काँग्रेसची एकहाती सत्ता आहे़ पण अतुल भोसलेंच्या भाजपप्रवेशाने नगरसेवकांची पंचाईत झालीय. तरीही काँग्रेसच्या चिन्हावर निवडून आलेल्या नगरसेवकांच्या हातात कमळ दिसतंय़ नगराध्यक्षा शारदा खिलारेंनीही हातात कमळ घेत विनोद तावडेंच्या सभेला हजेरी लावली़ कारणे काहीही सांगितली जात असली तरी समर्थकात त्यांचा नगराध्यक्षपदाचा पत्ता कट झाला, अशीच चर्चा आहे़
हे पत्ते कधी ओपन होणार?
कऱ्हाड नगरपालिकेच्या राजकारणात सर्वांत मोठी लोकशाही आघाडी आहे़ उत्तरचे आमदार बाळासाहेब पाटील यांच्याकडे त्याचे नेतृत्व आहे़ पण उत्तरच्या निवडणुकीत व्यस्त असणाऱ्या बाळासाहेबांची दक्षिणच्या लोकशाही आघाडीची भूमिका गुलदस्त्यात आहे़ या आघाडीच्या नगरसेवकांचे पत्ते कधी ओपन होणार, याकडे साऱ्यांचे लक्ष आहे़