युवकाच्या खूनप्रकरणी सख्ख्या भावांना अटक

अक्षय अनिल गवळी (वय २६) व त्याचा लहान भाऊ आकाश (२३, रा. गोवारे, ता. कऱ्हाड) अशी अटक करण्यात आलेल्या आरोपींची नावे आहेत. चौंडेश्वरीनगर-गोवारे गावच्या हद्दीत मळी नावच्या शिवारात किरण लादे (रा. बुधवार पेठ, कऱ्हाड) या युवकाचा शुक्रवारी रात्री गुप्तीने वार करून तसेच दगडाने ठेचून खून करण्यात आला होता. शनिवारी सकाळी किरणचा मृतदेह आढळल्यानंतर हा प्रकार उघडकीस आला. या घटनेने बुधवार पेठेत तणावाचे वातावरण निर्माण झाले होते. याप्रकरणी कऱ्हाड शहर पोलिसात गुन्हा दाखल करून पोलिसांनी तपास सुरू केला. शहराची संवेदनशील पार्श्वभूमी लक्षात घेऊन गुन्ह्याच्या तपासासाठी स्थानिक गुन्हे शाखेलाही अधीक्षक अजयकुमार बन्सल यांनी सूचना दिल्या होत्या. त्यानुसार सहायक पोलीस निरीक्षक रमेश गर्जे यांनी कऱ्हाडला भेट देऊन परिसरातील काही साक्षीदारांकडे विचारपूस केली. त्या वेळी त्यांना खबऱ्यांकडून माहीती मिळाली. त्यानुसार किरण लादेचा खून चौंडेश्वरीनगर येथील दोघांनी केल्याचे समोर आले. त्यांची नावे अक्षय व आकाश गवळी असल्याचेही पोलिसांना समजले. दोन्ही आरोपी सख्खे भाऊ असून गुन्हा केल्यानंतर ते पुण्याला पळून गेल्याचे चौकशीतून समोर आले.

सहायक पोलीस निरीक्षक रमेश गर्जे यांच्यासह पोलीस पथक तातडीने पुण्याला रवाना झाले. या पथकाने पुण्यातून दोघांनाही ताब्यात घेऊन अटक केली. दोन्ही आरोपींना कऱ्हाड शहर पोलिसांकडे वर्ग करण्यात आले आहे.