दुचाकींच्या अपघातात पेंटरचा मृत्यू

कऱ्हाड : दोन दुचाकींच्या अपघातात पेंटरचा मृत्यू झाला. पाचवडफाटा, ता. कऱ्हाड येथे शुक्रवारी सायंकाळी साडेपाच वाजण्याच्या सुमारास ही घटना घडली. याप्रकरणी एकावर कऱ्हाड ग्रामीण पोलीस ठाण्यात गुन्हा नोंद करण्यात आला आहे.

पंढरीनाथ मारुती पाटील (रा. गिरजवडे, ता. शिराळा, जि. सांगली) असे अपघातात मृत झालेल्याचे नाव आहे. याप्रकरणी जगदीश चंद्रदेव प्रसाद (वय ३२, सध्या रा. नांदलापूर, मूळ रा. पकडीलाता, ता. सिलेमपूर, उत्तरप्रदेश) याच्यावर गुन्हा नोंदविण्यात आला आहे. अपघातावेळी जगदीश प्रसाद हा मद्यधुंद स्थितीत होता, असे फिर्यादीत म्हटले आहे. मृत पंढरीनाथ यांचा मुलगा प्रतीक याने याबाबतची फिर्याद दिली आहे. पोलिसांनी दिलेल्या माहितीनुसार, गिरजवडे येथील पंढरीनाथ पाटील हे पेंटर होते. ते कऱ्हाडात पेंटींगचे काम करीत होते. शुक्रवारी सकाळी ते नेहमीप्रमाणे कऱ्हाडला कामावर आले होते. काम संपल्यानंतर परत घरी जात असताना पाचवडफाटा येथे पेट्रोल पंपाच्या वळणावर त्यांच्या दुचाकीला (क्र. एमएच १० डीडी १२१९) दुसऱ्या दुचाकीने (क्र. एमएच ५० एस ३३६४) धडक दिली. त्यामध्ये पंढरीनाथ पाटील हे गंभीर जखमी झाले होते. त्यांना उपचारार्थ कृष्णा रुग्णालयात दाखल करण्यात आले. मात्र, उपचारादरम्यान त्यांचा मृत्यू झाला. अपघाताची नोंद कऱ्हाड ग्रामीण पोलिसात झाली आहे. उपनिरीक्षक अशोक भापकर तपास करीत आहेत.