चाफळमधील समर्थ विद्यामंदिरात वृक्षारोपण

चाफळ : पाटण तालुक्याच्या चाफळ विभागातील समर्थ विद्यामंदिर व ज्युनिअर काॅलेज परिसरात वृक्षारोपण करण्यात आले. या विद्यालयाचे वसतिगृह अधीक्षक संभाजी बाबर हे दरवर्षी शालेय परिसरात झाडे लावण्याचा अनोखा उपक्रम राबवत असतात. गेल्या दहा वर्षांपासून ते शालेय परिसरात हा उपक्रम राबवून शालेय विद्यार्थ्यांसह इतरांना प्रेरणा देण्याचे काम करत आहेत. या उपक्रमाबद्दल त्यांचे सर्व स्तरांतून कौतुक करण्यात येत आहे.

चाफळ येथे समर्थ विद्यामंदिर व ज्युनिअर काॅलेज आहे. या विद्यालयात दरवर्षी वसतिगृह अधीक्षक संभाजी बाबर व शाळेचे प्राचार्य ए.जे. कुंभार हे शालेय विद्यार्थ्यांमध्ये वृक्षारोपणाची प्रेरणा वाढीस लागावी, यासाठी दरवर्षी वृक्षलागवडीचा उपक्रम राबवत असतात. नुकतेच या विद्यालयाच्या परिसरात शाळेचे प्राचार्य ए.जे. कुंभार व संभाजी बाबर यांनी विविध जातींची फुलझाडे आणून वृक्षारोपण केले. या वेळी चाफळचे माजी सरपंच वसंतराव जाधव, सामाजिक कार्यकर्ते संभाजी देशमुख, शिक्षक ई.ए. कुंभार, शिरतोडे यांच्यासह शिक्षक व कर्मचाऱ्यांची उपस्थिती होती.