रेल्वेचा शेतकऱ्यांना पाचपट मोबदला

कऱ्हाड : पार्ले, बाबरमाची, सयापूर, यशवंतनगर, शिरवडे या कऱ्हाड तालुक्यातील शेतकऱ्यांना पुणे-मिरज-लोंढा रेल्वे दुपदरीकरणामध्ये संपादित होणाऱ्या जमिनीचा बाजारभावाच्या पाचपट बागायती जमिनीप्रमाणे मोबदला देण्यात आला आहे. कऱ्हाडचे प्रांताधिकारी उत्तम दिघे यांच्या हस्ते पार्ले येथील शेतकऱ्यांना मोबदल्याच्या धनादेशांचे नुकतेच वाटप करण्यात आले.

यावेळी रेल्वे आंदोलनाचे शेतकरी नेते सचिन नलवडे, प्रकल्पबाधित शेतकरी दिनकर नलवडे, भीकू नलवडे, तुकाराम नलवडे, भीमराव पाटील, रामचंद्र जाधव, संजय नलवडे, तानाजी जाधव, अशोक नलवडे, तानाजी नलवडे, शिवाजी नलवडे, विनोद नलवडे, संतोष नलवडे, सनी नलवडे, सचिन पाटील उपस्थित होते.

गेल्या तीन वर्षांपासून शेतकऱ्यांचा रेल्वे प्रशासनाविरोधात लढा सुरु होता. शेतकऱ्यांना मोबदला न देता रेल्वे विभागाने विविध ठिकाणी कामे सुरु केली होती. शेतकऱ्यांच्या शेतामध्ये रेल्वेच्या हद्दीचे खांब उभे केले होते. शेतकऱ्यांची जमीन आमचीच असल्याचा दावा रेल्वे प्रशासन करत होते. यावेळी शेतकऱ्यांना सोबत घेऊन स्वाभिमानी शेतकरी संघटनेचे तत्कालीन जिल्हाध्यक्ष सचिन नलवडे यांना सोबत घेऊन शेतकऱ्यांनी मोठा लढा उभा केला. रेल्वेची विनामोबदला सुरु असलेली कामे सचिन नलवडे यांनी बंद केली होती. त्यानंतर तत्कालीन खासदार उदयनराजे भोसले, जिल्ह्याधिकारी श्वेता सिंघल, प्रांत हिम्मत खराडे, भूसंपादन शाखेचे दिनकर ठोंबरे व रेल्वे अधिकारी यांची शेतकऱ्यांसोबत बैठक होऊन शेतकऱ्यांच्या जमिनी सातबाऱ्याप्रमाणे मोजण्याचे ठरले. त्यानुसार कऱ्हाड तालुक्यातील शेतकऱ्यांच्या जमिनीची मोजणी करण्यात आली. मोजणी मध्ये रेल्वेच्या प्रस्तावातील जमिनीच्या क्षेत्रफळापेक्षा जास्त जमीन रेल्वेसाठी संपादित होत असल्याचे निदर्शनास आले.

नुकतेच या गावातील सर्व शेतकऱ्यांना वाढीव क्षेत्रासह बाग़ायती जमिनीप्रमाणे बाजारभावाच्या पाचपट मोबदला मिळाला आहे. जमिनीला पाच लाख, दीड लाख रुपये गुंठाप्रमाणे तर बाधित होणाऱ्या फळझाडांना पुढील पीक गृहित धरून मोबदला मिळाला आहे. घर, शेड, विहीर यालाही शासन निर्णयानुसार चांगला भाव मिळाल्याने शेतकऱ्यांनी आनंद व्यक्त केला आहे.

कोट

शेतकऱ्यांच्या एकजुटीचा हा विजय असून, या आंदोलनासाठी विविध गावातील ज्येष्ठ लोकांनी सहकार्य केले. तसेच प्रसारमाध्यमांनीही याकडे लक्ष देऊन प्रश्न ज्वलंत ठेवला. कऱ्हाड विमानतळ भूसंपादनाचा अनुभव समोर असल्याने तुटेपर्यंत न ताणता प्रमुख मागण्या मान्य झाल्याने शेतकऱ्यांनी भूसंपादनाला सहमती दिली. शेवटच्या शेतकऱ्याला न्याय मिळेपर्यंत लढा सुरु राहणार आहे.

- सचिन नलवडे

शेतकरी नेते

फोटो

कऱ्हाड येथे शेतकऱ्यांना धनादेश प्रांताधिकारी उत्तम दिघे यांनी धनादेश प्रदान केले. यावेळी सचिन नलवडे उपस्थित होते.