नवजा, महाबळेश्वरचा पाऊस चार हजारी

सातारा : जिल्ह्याच्या पश्चिम भागात सध्या तुरळक स्वरुपात पाऊस होत असला तरी आतापर्यंत नवजा आणि महाबळेश्वरला ४ हजार मिलीमीटरवर पर्जन्यमान झाले आहे. तर कोयनेला आतापर्यंत ३४३० मिलीमीटर पावसाची नोंद झालेली आहे.

जिल्ह्याच्या पश्चिम भागात तीन आठवड्यापूर्वी धुवाधार पाऊस झाला होता. कोयना, नवजा, महाबळेश्वर, तापोळा, बामणोली या भागात तर तुफान वृष्टी झाली. यामुळे शेतीचे नुकसान झाले. तसेच रस्ते, पूल वाहून गेले. या पावसामुळे मोठ्या प्रमाणात नुकसान झाले. तर या अतिवृष्टीमुळे जिल्ह्याच्या पश्चिम भागातील प्रमुख धरणांत मोठ्या प्रमाणात पाण्याची आवक आली. कोयना धरणात तर एका दिवसात १६ टीएमसीवर पाण्याची आवक झाली. कोयना धरणाच्या इतिहासातील हा एक विक्रम ठरला. त्यामुळे अवघ्या काही दिवसात कोयना धरणातील पाणीसाठा ९० टीएमसीच्यावर पोहोचला होता. तर कण्हेर, उरमोडी, धोम, बलकवडी, तारळी या सारख्या धरणांतही मोठ्या प्रमाणात पाणी आले. सध्या पश्चिम भागात पाऊस कमी झाल्याने धरणांत येणाऱ्या पाण्याची आवक मंदावली आहे. त्यामुळे कोयना वगळता अन्य धरणांतून विसर्ग बंद करण्यात आलेला आहे.

गुरुवारी सकाळपर्यंतच्या २४ तासांत कोयनेला अवघा ८ मिलीमीटर पाऊस झाला. तर नवजा येथे १४ आणि महाबळेश्वरला सकाळपर्यंत ७ मिलीमीटर पर्जन्यमानाची नोंद झालेली आहे. यावर्षी जुलै महिन्यात अवघ्या तीन दिवसांत पश्चिम भागात तुफान पाऊस पडला होता. यामुळे कोयना, नवजा आणि महाबळेश्वरच्या पावसाने नवा विक्रम केला. तर सध्या पावसाचे प्रमाण तुरळक असले तरी आतापर्यंत कोयना, नवजा आणि महाबळेश्वरला मोठ्या प्रमाणात पाऊस झालेला आहे. कोयना येथे जूनपासून आतापर्यंत ३४३० मिलीमीटर पावसाची नोंद झालेली आहे. तर नवजाला ४३८८ आणि महाबळेश्वरला ४४८० मिलीमीटर पर्जन्यमान झाले आहे. पावसाळ्याचा अजून दीड महिना बाकी आहे. त्यामुळे या तीनही ठिकाणचे पर्जन्यमान ५ हजार मिलीमीटरचा टप्पा ओलांडेल अशी शक्यता वर्तविण्यात येत आहे.

चौकट :

कोयनेतील साठा ९१ टीएमसीजवळ...

पश्चिम भागात तुरळक प्रमाणात पाऊस होत आहे. त्यामुळे धरणांत येणाऱ्या पाण्याची आवक मंदावलेली आहे. त्यामुळे कोयना वगळता इतर धरणांतून विसर्ग बंद करण्यात आलेला आहे. गुरुवारी सकाळच्या सुमारास कोयना धरणात ९०.८८ टीएमसी एवढा पाणीसाठा झाला होता. तर धरणात २१०० क्युसेक पाण्याची आवक होत होती. धरणाच्या दरवाजातील विसर्ग आठ दिवसांपासून बंद आहे. सध्या फक्त पायथा वीजगृहातून २१०० क्युसेक पाण्याचा विसर्ग करण्यात येत आहे.

.......................................................