कत्तलखान्याकडे जाणाऱ्या जनावरांची सुटका

फलटण : सोनवडी बुद्रुक (ता. फलटण) गावच्या हद्दीत सोनवडी ते विडणी रस्त्यावर पिकअप गाडीत दाटीवाटीने जनावरे कोंबून ते कत्तल करण्यासाठी नेत असताना ग्रामीण पोलिसांनी छापा टाकून गाडी व जनावरे, असा २ लाख ३२ हजार रुपयांचा मुद्देमाल जप्त केला. मात्र, वाहनचालक फरार झाला आहे.

याबाबत अधिक माहिती अशी की, सोनवडी बुद्रुक (ता. फलटण) गावच्या हद्दीत सोनवडी ते विडणी रस्त्यावर शनिवारी दुपारी पाचच्या सुमारास पिकअप गाडीमधून (एमएच ११ एजी ९४७०) एकजण जर्सी गाय व त्या गायीचे दीड महिन्याचे वासरू, दोन देशी गायी व दोन वासरे गाडीत दाटीवाटीने कोंबून घेऊन जात असताना पोलिसांनी गाडी अडवली. पोलिसांना बघून गाडीतील चालक पळून गेला. पोलिसांनी तीन गायी व तीन वासरे ताब्यात घेऊन ती गोशाळेत पाठविले असून, एकूण गाडीसह २ लाख ३२ हजारांचा मुद्देमाल जप्त केला आहे. अधिक तपास पोलीस हवालदार रामदास लिमन करीत आहेत.