जकातवाडीतील जलशुद्धीकरण केंद्र गाळमुक्त
By लोकमत न्यूज नेटवर्क | Published: June 3, 2021 04:27 AM2021-06-03T04:27:25+5:302021-06-03T04:27:25+5:30
सातारा : शहापूर पाणीपुरवठा योजनेच्या माध्यमातून वितरण होणाऱ्या जलवाहिनीला बोगदा परिसरात लागलेली गळती काढण्याचे काम युद्धपातळीवर सुरू असतानाच पालिकेच्या ...
सातारा : शहापूर पाणीपुरवठा योजनेच्या माध्यमातून वितरण होणाऱ्या जलवाहिनीला बोगदा परिसरात लागलेली गळती काढण्याचे काम युद्धपातळीवर सुरू असतानाच पालिकेच्या पाणी पुरवठा विभागाने जकातवाडी येथील जलशुद्धीकरण केंद्र गाळमुक्त करण्याचे काम हाती घेतले आहे. पाणी पुरवठा सभापती सीता राम हादगे यांनी या कामाची पाहणी करून काम वेळेत पूर्ण करण्याच्या सूचना कर्मचाऱ्यांना दिल्या.
जकातवाडी (ता. सातारा) येथील शुद्धीकरण केंद्रातून सातारा शहराला पाणीपुरवठा करण्यात येतो. पावसाळ्यापूर्वी या टाकीची स्वच्छता करण्यात येते. मान्सून महाराष्ट्रामध्ये दाखल होण्याची चिन्हे निर्माण झाली असतानाच रविवारी बोगदा परिसरात असणाऱ्या शहापूर पाणी पुरवठा योजनेच्या जलवाहिनीला गळती लागली. ही गळती काढण्याचे काम पाणी पुरवठा विभागाच्या माध्यमातून युद्धपातळीवर हाती घेण्यात आले आहे.
दरम्यान, हे काम मार्गी लावत असतानाच पाणी पुरवठा सभापती सीता राम हादगे, अभियंता सुधीर चव्हाण, दिग्विजय घाडगे, रत्नाकर वडई, सुपरवायझर संदीप सावंत, महेश माने हे कर्मचाऱ्यांसह जकातवाडी येथील जलशुद्धीकरण केंद्रावर दाखल झाले. यानंतर पाण्याच्या टाकीतील गाळ काढण्याचे काम हाती घेण्यात आले. बोगदा परिसरातील गळती काढण्याचे काम सुरू असतानाच जलशुद्धीकरण केद्राची स्वच्छता करण्यात आली. अन्यथा केवळ या कामासाठी पाणी पुरवठा एक दिवस बंद ठेवावा लागला असता. भविष्यातही नगराध्यक्ष माधवी कदम, उपनगराध्यक्ष मनोज शेंडे आणि सर्व सभापती, नगरसेवक यांच्या सहकार्याने पाणी पुरवठा विभागाचा आलेख उंचावत राहू, अशी प्रतिक्रिया पाणी पुरवठा सभापती सीता राम हादगे यांनी दिली.
फोटो : ०२ जकातवाडी
सातारा पालिकेच्या पाणी पुरवठा विभागाकडून जकातवाडी येथील जलशुद्धीकरण केंद्र गाळमुक्त करण्यात आले. या कामाची सभापती सीता हादगे यांनी पाहणी केली.