स्वार्थी टोळ्यांना निवडणुकीत रोखा

कऱ्हाड : ‘ज्येष्ठ नेते यशवंतराव मोहिते यांच्या मार्गदर्शनाखाली पंधरा वर्षे कारखान्यात सभासद हिताच्या अनेक गोष्टी घडल्या. त्यांनी विचार आणि कृतीची सांगड घालून कारखाना व सभासद विकासाची विशिष्ट उंची निर्माण केली. असाच विकास त्यांच्या मार्गदर्शनाखाली कारखान्याच्या स्थापनेनंतर झाला. त्या विकासामध्ये स्वार्थाची बुद्धी बळावल्याने विकासाची प्रक्रिया थांबली. विकासाची बेटे विकेंद्रित न होता ती स्वकेंद्रित झाली. त्यामुळे खासगीकरणाचा विचार यापुढे का होणार नाही? असे सांगून स्वार्थी टोळ्यांना या निवडणुकीत रोखा’, असे आवाहन यशवंतराव मोहिते रयत पॅनलचे प्रमुख डॉ. इंद्रजित मोहिते यांनी केले.

यशवंतराव मोहिते रयत पॅनेलच्या प्रचार दौऱ्यात दुशेरे येथील बैठकीत ते बोलत होते. यावेळी सभासद मोठ्या संख्येने उपस्थित होते.

डॉ. मोहिते म्हणाले, ‘समोरील दोन्ही पॅनलचे नेते व कार्यकर्ते कारखान्याकडे खाण्याचे कुरण म्हणून पाहतात. त्यांना सत्ता कधी मिळतेय व कधी एकदा स्वतःचे खिसे भरतोय, याचे स्वप्न ही मंडळी पाहत आहेत. एका पॅनलचे प्रमुख कारखान्यावर कधीतरी भेटतात, तर दुसऱ्या पॅनलचे नेते भेटले तर त्यांची बुद्धी असंविधानिक व्यक्ती चालवते. सभासदांनी याचा विचार करावा व आपले पवित्र मत रयत पॅनलला देऊन विकासाचा सुवर्ण काळ आणावा.’

फोटो ओळ

गोळेश्वर, ता. कऱ्हाड येथे रयत पॅनलच्या उमेदवारांनी सभासदांची थेट भेट घेत प्रचार केला.