विहेत तेरा रुग्ण सापडले; गाव सील करण्याचा घेतला निर्णय

विहे (ता. पाटण )गावात कोरोनाचे १३ रुग्ण सापडल्यामुळे शासनाने संपूर्ण गाव सील केले. अत्यावश्यक सेवा वगळता २० मार्च अखेर संपूर्ण गावातील दुकाने बंद केली. मास्क न वापरणाऱ्या ग्रामस्थास ५०० रुपये दंड आकारला जाणार असल्याची माहिती उपसरपंच अविनाश पाटील यांनी दिली.

गेल्या दोन दिवसात १३ जण कोरोना पॉझिटिव्ह आल्यामुळे आज पाटणचे प्रांताधिकारी, तहसीलदार, पाटण व मल्हारपेठ आरोग्य विभागाचे अधिकारी यांनी कोरोनाचा प्रादुर्भाव झालेल्या भागाची पाहणी केली. संपूर्ण गाव सील करण्याचा निर्णय घेतला. आज ७६ ग्रामस्थांचे नमुने तपासणीसाठी घेण्यात आले. १३ पैकी १ रुग्ण दवाखान्यात असून बाकीचे रुग्ण गावातील समाज मंदिरात व घरात क्वॉरंटाईन केले आहेत. संबंधित वॉर्ड फवारणी करण्यात आला असून गावात मास्क न वापरणाऱ्यास ५०० रुपये दंड करण्याचा निर्णय घेतला आहे.