गुरेघर शॉपिंग सेंटरमधील चोरीप्रकरणी तिघांना अटक

पाचगणी : गुरेघर, ता. महाबळेश्वर येथील शॉपिंग सेंटरमध्ये झालेल्या चोरी प्रकरणात तिघांना पोलिसांनी अटक केली आहे. सनी सुरेश जाधव, सागर सुरेश जाधव, अक्षय गोरख माळी अशी अटक केलेल्यांची नावे आहेत.

याबाबत माहिती अशी की, गुरेघर येथील ग्रामपंचायतीच्या शॉपिंग सेंटरमध्ये १९ फेब्रुवारी राेजी मध्यरात्री पाच दुकानांचे शटर उचकटून दुकानांतील चार हजार २०० रुपयांची रोकड चोरट्यांनी लंपास केली होती. याबाबतची राहुल प्रकाश सणस यांनी पाचगणी पोलीस ठाण्यात फिर्याद दाखल केली होती. त्यानुसार या दाखल गुन्ह्याचा तपास पाचगणी पोलीस करीत होते.

पोलीस हवालदार शिवाजी पाम्बरे, सहायक फौजदार कदम, पोलीस नाईक विजय मुळे व जितेंद्र कांबळे यांनी या चोरीचा छडा लावीत तीन आरोपींना अटक केली. यामध्ये सनी सुरेश जाधव (वय २६), सागर सुरेश जाधव (२४), अक्षय गोरख माळी (१९, सर्व रा. गुरेबाजार सिद्धनाथवाडी, वाई, ता. वाई) यांना ताब्यात घेतले. त्यांच्याजवळून चोरीची सर्व रक्कम हस्तगत केली आहे. घडलेला गुन्हा उघडकीस आणला आहे.

त्याचबरोबर त्यांच्याकडून अधिक गुन्ह्याचा तपास सहायक पोलीस निरीक्षक सतीश पवार यांच्या मार्गदर्शनाखाली पाचगणी पोलीस करीत आहेत.