महिलेवर वार करून दागिने लुटणाऱ्या दोघांना अटक

सणबूर : चाकूने वार करून महिलेकडील सुमारे सव्वा लाखाचे दागिने लंपास करणाऱ्या दोन चोरट्यांना पाेलिसांनी बारा तासांत गजाआड केले. ढेबेवाडी पोलिसांनी गुरुवारी सकाळी ही कारवाई केली. अंकुश दिनकर पवार (रा. शिद्रुकवाडी, ता. पाटण) याच्यासह अन्य एकास पोलिसांनी अटक केली आहे. त्यांच्याकडून चोरीचा मुद्देमालही हस्तगत करण्यात आला आहे.

पोलिसांनी दिलेल्या माहितीनुसार, शिद्रुकवाडीतील छाया यांच्या आई हौसाबाई कोळेकर यांना बुधवारी कारमधून तळमावले येथे एका खासगी रुग्णालयात नेले होते. दुपारी एक वाजण्याच्या कारचालक अंकुश पवार याच्यासह छाया कोळेकर व त्यांची आई हौसाबाई हे तिघेजण कारमधून पुन्हा शिद्रुकवाडीकडे जाण्यास निघाले. त्यावेळी घाटात त्यांच्या कारला एकाने हात केला. कार थांबवताच संबंधिताने चालक अंकुश पवार याच्या गळ्याला सुरा लावला. तसेच हौसाबाई कोळेकर यांच्या गळ्यातील चेन हिसकावून घेतली. दुसरी बोरमाळ हिसकावत असताना छाया यांनी प्रतिकार केला असता चोरट्याने त्यांच्या हातावर वार केला. दागिने घेऊन संबंधित चोरट्यासह त्याचा साथीदार पसार झाला. याप्रकरणी सहायक पोलीस निरीक्षक संतोष पवार, हवालदार खराडे, प्रशांत चव्हाण, कपिल आगलावे यांनी तपास करून दोन्ही आरोपींना अटक केली.

फोटो २६ढेबेवाडी

शिद्रुकवाडी येथील महिलेला लुटल्याप्रकरणी ढेबेवाडी पोलिसांनी गुरुवारी दोघांना अटक केली.