साताऱ्यात दोन दुचाकी चोरट्यांना पकडले

सातारा : दुचाकी चोरी करणाऱ्या दोन चोरट्यांना अटक करून त्यांच्याकडून दोन दुचाकी हस्तगत करण्यात स्थानिक गुन्हे शाखेच्या पथकाला यश आले आहे.

चेतन बाळासो जाधव (वय २१), सूरज परशुराम नंदीवाले (वय १९ दोघेही रा. पाचवड, ता. वाई) अशी अशी अटक करण्यात आलेल्याची नावे असून यांच्याकडून आणखी गुन्हे उघडकीस येण्याची शक्यता पोलिसांनी वर्तवली आहे.

याबाबत पोलिसांनी दिलेली माहिती अशी, दि. १९ रोजी स्थानिक गुन्हे शाखेचे पोलीस निरीक्षक किशोर धुमाळ यांच्या सूचनांप्रमाणे सहायक पोलीस निरीक्षक रमेश गर्जे व पथक सातारा शहरात गुन्हे प्रतिबंधक पेट्रोलिंग करीत असताना शुक्रवारी दुपारी चार वाजता जुना आर.टी.ओ चौक ते वाडे फाटा जाणाऱ्या रस्त्यावरील जरंडेश्वर मारुती मंदिरासमोर दोन युवक वेगवेगळ्या मोटार सायकलवरून वाढे फाटा बाजूकडे जाताना पोलिसांना दिसले. त्यांच्यापैकी एकाच्या गाडीवर नंबरप्लेट नसल्याने त्यांना थांबवून त्यांच्याकडे विचारपूस केली असता त्यांनी त्यांच्या ताब्यातील दोन्ही मोटार सायकल चोरीच्या असल्याची माहिती दिली. तसेच या दोघांची नावे चेतन आणि सूरज असल्याचे त्यांनी पोलिसांना सांगितले. त्यांच्याजवळील चोरीच्या मोटारसायकलबाबत पोलिसांनी खात्री केली असता एक मोटार सायकलच्या चोरीबाबत वाठार पोलीस ठाण्यात व दुसऱ्या मोटारसायकल चोरीबाबत राजगड पोलीस ठाण्यात गुन्हे दाखल असल्याचे समोर आले.

ही कारवाई स्थानिक गुन्हे शाखेचे पोलीस निरीक्षक किशोर धुमाळ यांच्या मार्गदर्शनाखाली सहायक पोलीस निरीक्षक रमेश गर्जे, सहायक फौजदार तानाजी माने, कांतीलाल नवघणे, अतिश घाडगे, संजय शिर्के, विजय कांबळे, शरद बेबले, प्रवीण फडतरे, नीलेश काटकर यांनी भाग घेतला.