कारच्या धडकेत दुचाकीस्वार जागीच ठार

कऱ्हाड : मद्यधुंद चालकाचा ताबा सुटून कारची दुचाकीला धडक बसली. या अपघातात दुचाकीस्वार जागीच ठार झाला. गुहागर - विजापूर राष्ट्रीय महामार्गावर सुपने (ता. कऱ्हाड) गावच्या हद्दीत शनिवारी दुपारी ३ वाजण्याच्या सुमारास हा अपघात झाला.

दरम्यान, अपघातानंतर कार महामार्गाच्या कडेला नाल्यात जाऊन पलटी झाली. यामध्ये कारचे मोठ्या प्रमाणावर नुकसान झाले आहे तर दुचाकीचाही चक्काचूर झाला आहे. कारचा चालक मद्यधुंद स्थितीत असल्याचे निदर्शनास आल्यानंतर जमावाने त्याला चोप दिला तसेच पोलिसांच्या स्वाधीन केले.

संजय सुभाष गुरव (वय ४४, रा. सुपने) असे अपघातात ठार झालेल्याचे नाव आहे. तर याप्रकरणी अजय शामराव हजारे (रा. साई प्लाझा, मेनरोड, पाटण) याच्यावर कऱ्हाड ग्रामीण पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, सुपने येथील संजय गुरव हे शनिवारी दुपारी दुचाकीवरून (क्र. एमएच ५० बी ८८५९) कऱ्हाडहून सुपने गावच्या दिशेने निघाले होते. ते गावानजीक पोहोचले असतानाच समोरून आलेल्या कारने (क्र. एमएच ५० एल ५४३३) त्यांच्या दुचाकीला धडक दिली. ही धडक एवढी भीषण होती की, संजय गुरव हे दुचाकीसह काही अंतरावर फरपटत जाऊन लोखंडी रेलिंगजवळ पडले. तर कार रस्त्याच्या दुसऱ्या बाजूला जाऊन उलटली.

यावेळी अपघात झाल्याचे समजताच परिसरातील ग्रामस्थांनी त्याठिकाणी धाव घेतली. ग्रामस्थांनी संजय गुरव यांना उपचारार्थ कऱ्हाडच्या उपजिल्हा रुग्णालयात नेले. मात्र, उपचारापूर्वीच त्यांचा मृत्यू झाला होता. या अपघाताची फिर्याद चेतन विजय पाटील (रा. सुपने) यांनी कऱ्हाड ग्रामीण पोलिसात दिली आहे. हवालदार राजे अधिक तपास करत आहेत.

- चौकट

दुसरा युवक सुदैवाने बचावला

संजय गुरव यांच्यापासून काही अंतरावरच चेतन विजय पाटील हे दुचाकीवरून घराकडे निघाले होते. यावेळी समोरून येणारी कार वेडीवाकडी वळणे घेत आपल्याच दिशेने येत असल्याचे चेतनच्या निदर्शनास आले. त्याने तातडीने आपली दुचाकी साईडपट्टीवरून खाली घेत थांबवली. त्यावेळी कार त्याच्या दुचाकीला कट मारून समोरून येणाऱ्या संजय गुरव यांच्या दुचाकीला धडकली. या धडकेत संजय यांचा मृत्यू झाला.

फोटो : १६केआरडी०३

कॅप्शन : गुहागर - विजापूर राष्ट्रीय महामार्गावर सुपने गावच्या हद्दीत शनिवारी दुपारी दुचाकीला धडक दिल्यानंतर कार नाल्यात उलटली. (छाया : दीपक पवार)