कारच्या धडकेत दुचाकीस्वार जागीच ठार

घटनास्थळावरून मिळालेल्या माहितीनुसार, शेरे येथील पंडित कळस्कर हे बुधवारी दुपारी कराडला रुग्णालयात गेले होते. तेथील काम आटोपून गावाकडे परत जात असताना वडगाव हवेलीजवळच्या कोडोली फाट्यावर समोरून उलट्या दिशेने आलेल्या कारने (क्र. एमएच ११ सीक्यू ४५६९) कळस्कर यांच्या दुचाकीला (क्र. एमएच १० बीवाय ९६०६) जोराची धडक दिली. अपघातात गंभीर दुखापत झाल्याने कळस्कर हे जागीच ठार झाले. अपघातानंतर त्यांची दुचाकी सुमारे शंभर फुटावर जाऊन आदळली होती. तसेच दुचाकीचे चाक निखळून पडले होते. अपघातानंतर अनेकांनी त्या ठिकाणी धाव घेतली.

अपघातात ठार झालेल्या पंडित कळस्कर यांचा शेरे स्टेशन येथे टेलरिंगचा व्यवसाय होता. बेताचीच परिस्थिती असताना त्यांनी अडीअडचणीवर मात करत व्यवसायाची घडी बसवली होती. मात्र, काळाने त्यांच्यावर घाला घातला. कराड ग्रामीण पोलिसांत अपघाताची नाेंद करण्यात आली आहे.

फोटो : २८केआरडी०३

कॅप्शन : कराड-तासगाव मार्गावर वडगाव हवेली येथे कारच्या अपघातात दुचाकीस्वार जागीच ठार झाला. (छाया : संतोष खांबे)

-------------