महामार्गावरील ओरखडे कधी बुजवणार

वेळे : आशियाई महामार्गावर पुणे ते सातारादरम्यान बऱ्याच ठिकाणी रस्ता खराब झाला आहे. त्यामुळे वाहनधारकांना मनस्ताप सहन करावा लागत आहे. काही ठिकाणी खड्ड्यांचे साम्राज्य तर काही ठिकाणी रस्त्यांवर ओरखडे ओढले गेले आहेत.

महामार्गावर जोशी विहीर ते पाचवडदरम्यान तब्बल वर्षापासून रस्त्यावर मारलेले ओरखडे अजूनही बुजवले गेले नाहीत. रस्त्यात अचानकपणे नजरेस पडणाऱ्या या ओरखड्यांची धास्ती सर्वच वाहनचालकांना वाटते. विशेषत: दुचाकीधारकांना तर विशेष काळजी घ्यावी लागते. अन्यथा त्या ओरखड्यांमधून वाहन घसरून भीषण अपघात होण्याची दाट शक्यता आहे.

या ओरखड्यांमुळे वाहनधारकांमधून तीव्र पडसाद उमटू लागले आहेत. गाडीचे टायर लवकर खराब होणे, टायर फुटणे, गाडी घसरणे यासारख्या शक्यतांमुळे येथे अपघातजन्य स्थिती निर्माण होऊ लागली आहे. तसेच यापूर्वी अनेकदा या ठिकाणी अपघातदेखील झाले आहेत. हे ओरखडे उड्डाणपुलावर असल्याने पुलाच्या कणखरतेचाही प्रश्न पुढे आला आहे. गेल्या वर्षभरापासून पडलेल्या ओरखड्यांमुळे या रस्त्यावरून दररोज प्रवास करणाऱ्या नोकरदारांना दुचाकीवरून जाताना भीती वाटू लागली आहे. येथील रस्त्याचे काम पूर्णत्वास नेऊन वाहनचालकांना दिलासा मिळावा, अशी मागणी वाहनचालक करीत आहेत. या रस्त्याच्या ठेकेदाराने हे काम त्वरित पूर्ण करून येथील अपघात रोखण्यासाठी मदत करावी, अशी मागणी वाहनचालकांमधून होत आहे.

फोटो..

१८वेळे

आशियाई महामार्गावर पुणे ते सातारादरम्यान बऱ्याच ठिकाणी रस्ता खराब झाला आहे. त्यामुळे वाहनधारकांना मनस्ताप सहन करावा लागत आहे.