कुत्रे आडवे आल्याने गाडीवरून पडून महिलेचा मृत्यू

डोक्याला गंभीर दुखापत झाल्याने उपचारादरम्यान झाला मृत्यू

सातारा : रस्त्यात कुत्रे आडवे आल्याने दुचाकीवरून पडून एका महिलेचा मृत्यू झाल्याची दुर्दैवी घटना जगदाळे बाग गोडोली येथे घडली. विजया बळीराम भिसे (वय ४३, रा. भांडूप मुंबई) असे मृत महिलेचे नाव आहे. 

याबाबत पोलिसांनी दिलेली माहिती अशी की, विजया भिसे या सोमवार, दि. २६ रोजी पहाटे चार वाजता मुंबईहून सातारा बसस्थानकात आल्या. यावेळी त्यांना नेण्यासाठी त्यांचे नातेवाईक आले. दुचाकीवर पाठीमागे बसून त्या जगदाळे बाग गोडोली येथे जात होत्या. 

दरम्यान गोडोली येथे रस्त्यात अचानक कुत्रे आडवे आले. त्यामुळे त्या दुचाकीवरून खाली पडल्या. यात त्यांच्या डोक्याला गंभीर दुखापत झाली. त्यांना तातडीने साताऱ्यातील खासगी रुग्णालयात दाखल केले. मात्र, उपचारादरम्यान त्यांचा मृत्यू झाला. सातारा शहर पोलिस ठाण्यात या अपघाताची नोंद झाली आहे.