अश्लील फोटो पतीला दाखवण्याची धमकी देत महिलेवर बलात्कार

लोकमत न्यूज नेटवर्क

सातारा : महिलेला एका लॉजवर नेऊन तिच्याशी जबरदस्तीने शरीर संबंध ठेवले. त्या संबंधांचे फोटो दाखवून पुन्हा ब्लॅकमेल करून बलात्कार करणाऱ्या उदय पृथ्वीराज तांगडे (वय ३४, रा. कोडोली, ता. सातारा) याला सातारा शहर पोलिसांनी अटक केली.

पीडित महिलेने सातारा शहर पोलीस ठाण्यात दिलेल्या तक्रारीत म्हटले आहे की, उदय तांगडे याने दि. २९ डिसेंबर २०२० ते १४ मार्च २०२१ या कालावधीत हा प्रकार केला आहे. एक दिवस गुलमोहर लॉजवर संशयित उदय तांगडे व पीडित महिला त्याच्याशी बोलत असताना तांगडेने गुपचूपपणे फोटो काढले. हे फोटो तुझ्या पतीला दाखवेन, अशी धमकी देत त्याने त्याच्या लॉजवर महिलेशी जबरदस्तीने शारीरिक संबंध ठेवले. हे संबंध ठेवतानाचे फोटोही त्याने नकळतपणे काढून घेतले. हे फोटो तुझ्या पतीला दाखवतो, अशी धमकी देत त्याने पीडित महिलेला लॉजवर बोलावून तिच्या इच्छेविरुद्ध शारीरिक संबंध ठेवले.

उदय तांगडे वारंवार या महिलेला शरीरसंबंधाची मागणी करू लागल्यानंतर तिने नकार दिल्याने त्याने महिलेचा फोन फोडून टाकला व फोटो पतीला दाखवण्याची धमकी दिली असल्याची तक्रार महिलेने दिली. पोलिसांनी याप्रकरणी उदय तांगडेला अटक केली असून या गुन्ह्याचा पुढील तपास सहायक पोलीस निरीक्षक बधे करत आहेत.