धुळदेवच्या देवाची यात्रा रद्द

फलटण : धुळदेव येथील धुळदेव देवाची यात्रा कोरोनाची परिस्थिती लक्षात घेऊन रद्द करण्यात आली आहे. ग्रामस्थ आणि प्रशासनाने कोरोनाचा संसर्ग आणि संक्रमण टाळण्यासाठी मोठा निर्णय घेतला आहे.

फलटण तालुक्यातील धुळदेव येथे ग्रामदैवत श्री धुळदेव देवाची यात्रा २९, ३० एप्रिल या कालावधीत होणार आहे. कोरोनाचा संसर्ग लक्षात घेता ग्रामदेवताची यात्रा उपविभागीय अधिकारी डॉ. शिवाजीराव जगताप यांनी रद्द केल्याचे आदेश जारी केले आहेत.

धुळदेव यात्रा कमिटीची फलटण शहर पोलीस ठाणेस्तरावर बैठक घेऊन धुळदेव देवाची यात्रा रद्द करणेबाबत आवाहन केले. या यात्रा कमिटी धुळदेव यांनी ही यात्रा ग्रामसभा घेऊन ठराव क्रमांक सातनुसार रद्द केली आहे.

कोरोना रोगाचे पार्श्वभूमीवर प्रशासनाने धुळदेव येथील श्री धुळदेव देवाची यात्रा रद्द केली आहे. कोणीही भाविक भक्त दर्शनासाठी धुळदेव येथे येणार नाहीत. यात्रे दिवशी फलटण शहर पोलीस ठाणेमार्फत योग्य तो पोलीस बंदोबस्त नेमण्यात येणार आहे. या ठिकाणी येणाऱ्या यात्रेकरूवर कडक कायदेशीर कारवाई करण्यात येणार आहे. त्यामुळे यात्रेसाठी कोणीही येऊ नये, असे आवाहन फलटण पोलीस ठाण्याचे पोलीस निरीक्षक भरत किंद्रे यांनी केले आहे.