माण-खटावमधील वाऱ्याची दिशा तुम्हाला पंधरा वर्षांत समजली नाही

म्हसवड : ‘गेल्या पंधरा वर्षांत जंग जंग पछाडूनही तुम्हाला माण-खटावमधील वाऱ्याची दिशा समजली नाही. तुम्ही माणमध्ये आला तेव्हा तुमचा पक्ष आणि बगलबच्चे निवडणुका हरल्याचा इतिहास तुमच्या नावे झाला आहे. तुमचे अतिक्रमण येथील स्वाभिमानी जनतेने नेहमीच हाणून पाडले आहे. पालकमंत्री, विधान परिषदेच्या सभापतिपदाची आयुधे घेऊन आजपर्यंत माणमध्ये आलात. ही राजकीय आयुधे बाजूला ठेवून मैदानात यायचे धाडस दाखवा,’ असे आव्हान आमदार जयकुमार गोरे यांनी दिले.

माण कृषी उत्पन्न बाजार समिती निवडणुकीच्या पार्श्वभूमीवर रामराजे यांच्या उपस्थितीत नुकतीच संवादसभा झाली. त्या वेळी रामराजेंनी ‘माणमधील वाऱ्याचा अंदाज घ्यायला आलोय, कार्यकर्त्यांना मान खाली घालावी लागेल अशी तडजोड होणार नाही,’ अशी वक्तव्ये केली होती. या पार्श्वभूमीवर आमदार जयकुमार गोरे यांनी सोमवारी पत्रकार परिषद घेऊन समाचार घेतला.

आमदार गोरे म्हणाले, ‘मी राजकारणात आल्यापासून रामराजेंना माणमधील वाऱ्याची दिशा समजली नाही. ते येथे आले तेव्हा राष्ट्रवादी निवडणुकांत पराभूत झाली. आपण माण-खटावमध्ये बिन बुलाये मेहमान असता. राष्ट्रवादीचे कार्यकर्ते येण्याने नाखूष असतात. जबरदस्तीने त्यांच्यावर नेतृत्व लादायच्या भानगडीत पडू नका. रामराजे यांना निवडणुकीपुरताच माण-खटाव आठवतो. चौदा महिन्यांपासून येथील जनता कोरोना महामारीला धैर्याने तोंड देत आहे. अनेकांचा कोरोनामुळे मृत्यू झाल्याने अनेक संसार उघड्यावर पडले.’

आमदार गोरे म्हणाले, ‘लोकांना उपचारासाठी बेड मिळत नव्हते, तेव्हा तुम्ही कोणते होकायंत्र शोधत होता. ‘आमचं ठरलंयवाले’ त्या काळात दडी मारून बसले होते. राष्ट्रवादीच्या आणि इतर शेकडो कार्यकर्त्यांना गरज होती तेव्हा आम्हीच बेड उपलब्ध करून दिले आहेत. राजकीय कटकारस्थाने करायला तुम्ही माणमध्ये अवश्य या, त्यासाठी स्वागतच आहे, मात्र इथली जबाबदारी घ्यायचे पुण्यकर्म कधीच केले नाही. एकतर तुम्हाला कुणीही मनापासून विचारत नाही. येथे आग लावून कंड्या पिकवण्याचे उद्योग करता असे तुमचेच पदाधिकारी खासगीत बोलतात. तुम्ही पालकमंत्री, विधान परिषदेचे सभापतिपद अशी आयुधे घेऊन इथे आलात आणि आमच्याशी लढलात. एकदा ही सगळी आयुधे बाजूला ठेवून मैदानात उतरावे.’