वाद भाजपच्या मुळावर

पंचायत समिती गमावली : आगामी निवडणुका महत्त्वाच्या

शिरीष नाईक - कसई दोडामार्ग पंचायत समितीवर भाजपची सत्ता असतानाही सभापतिपद व उपसभापतिपद ही दोन्ही पदे गेल्याने भाजप गोटात वादळ उठले आहे. भाजपमधील अंतर्गत वाद दोडामार्गमध्ये भाजपच्या मुळावर येतो की काय, अशीच चिन्हे दिसू लागली आहेत. नगरपंचायतीनंतर आता पंचायत समितीवरील सत्ता गेल्याने भाजपवर विरोधात राहून काम करण्याची नामुष्कीची वेळ आली आहे. त्यामुळे भाजप आगामी निवडणुकांमध्ये कशी रणनीती आखते, हे पाहणे औत्सुक्याचे ठरणार आहे.
दोडामार्ग पंचायत समितीमध्ये भाजपचा एक सदस्य, शिवसेनेचे दोन, राष्ट्रवादीचे दोन व काँग्रेसचा एक अशी सदस्य संख्या आहे. त्यामुळे कोणालाही बहुमत नव्हते. राष्ट्रवादीकडे दोन सदस्य व एक काँगे्रसचा सदस्य मिळून तीन सदस्य एकत्र आले. तसेच भाजपचे व शिवसेनेचे तीन सदस्य एकत्र आले.
३-३ असे अशी सदस्य संख्या झाली होती.
राष्ट्रवादीच्या सदस्या सुचिता दळवी यांना सभापती बनवावे, असे काँग्रेस-राष्ट्रवादीने ठरविले. मात्र, निवडणुकीच्यावेळी काँग्रेसचे महेश गवस हे गैरहजर राहिले. त्यामुळे दळवी यांचा पत्ता कट झाला. भाजप-सेनेने युती करत सभापतिपद भाजपच्या सीमा जंगले, तर उपसभापतिपद शिवसेनेचे आनंद रेडकर यांना सोपविण्यात आले. मध्यंतरातील राजकीय घडामोडीनंतर पंचायत समितीचे समीकरण बदलले. भाजप-सेनेत अंतर्गत वाद झाले. सेनेचे जनार्दन गोरे हे काँगे्रसवासीय झाले, तर राष्ट्रवादीच्या सदस्या विशाखा देसाई शिवसेनेत गेल्या. भाजपने सभापती व उपसभापती ही दोन्ही पदे आपल्या ताब्यात ठेवण्यासाठी राजेंद्र म्हापसेकर यांनी काँग्रेसचे सदस्य महेश गवस व सेनेचे सदस्य आनंद रेडकर यांना फोडून भाजपत प्रवेश करून घेतला. भाजपकडे तीन सदस्य झाले. सभापती निवडीवेळी काँगे्रस-राष्ट्रवादी व शिवसेनेने भाग घेतला नाही. त्यामुळे सभापती व उपसभापती पद ही दोन्ही पदे भाजपकडे राहिली. परस्पर भाजपने आपला मित्रपक्ष शिवसेनेचा काटा काढला. तो राग शिवसेनेला होता. तसेच सुचिता दळवी यांचे सभापतिपद महेश गवस यांच्यामुळे हुकले होते. तो रागही राष्ट्रवादीचे नेते सुरेश दळवी यांच्या मनात होता.
तर काँग्रेसचे जिल्हा परिषद उपाध्यक्ष एकनाथ नाडकर्णी यांना सभापतींच्या खुर्चीवर बसले म्हणून पत्रकबाजी करून पोलिस ठाण्यापर्यंत तक्रार नेल्याने महेश गवस यांचा काटा कसा काढावा, याची व्यूहरचना राष्ट्रवादी व काँग्रेस पक्षाने केली. योग्य संधीची ते वाट पाहत होते. महेश गवस यांच्यावर अविश्वास ठराव आणण्यासाठी पाच सदस्य एकत्र आले. या संधीचा फायदा काँग्रेस-राष्ट्रवादीने घेतला. भाजपाचे जिल्हा उपाध्यक्ष राजेंद्र म्हापसेकर यांच्या मर्जीतले सदस्य माजी सभापती सीमा जंगले यांना काँग्रेसने फोडले, तर उपसभापती आनंद रेडकर यांचा काँग्रेसमध्ये प्रवेश करून घेतला आणि भाजपला अचानक झटका दिला. त्यामुळे भाजपच्या गोटात वादळ उठले. सभापती महेश गवस मनमानी कारभार करतात, म्हणून पाच सदस्यांनी गवस यांच्याविरूध्द अविश्वास ठराव आणला. तो ४ विरूध्द १ ने मंजूर झाला. त्यामुळे महेश गवस यांचे सभापती पद गेले. निवडणुकीच्यावेळी सीमा जंगले यांनी तटस्थ राहत मतदान प्रक्रियेत भाग घेतला नाही. तरीही काँग्रेस-राष्ट्रवादीची खेळी यशस्वी झाली. त्यामुळे आता राजकीय बलाबल राष्ट्रवादी-२ सदस्य, काँग्रेस-२, भाजपा-२ व शिवसेना-० असे झाले आहे. काँग्रेस-राष्ट्रवादीकडे चार सदस्य असल्याने बहुमताचा आकडा झाला आहे. भाजपचे उपसभापती आनंद रेडकर यांनी काँग्रेसमध्ये प्रवेश केल्याने उपसभापती पद काँग्रेसकडे गेले आहे. सभापती पद रिक्त राहिल्याने त्याजागी राष्ट्रवादीच्या सुचिता दळवी यांची वर्णी लागणार आहे.
येत्या जिल्हा परिषद व पंचायत समितीच्या निवडणुकीत काँगे्रस-राष्ट्रवादीलाच बहुमत मिळेल, अशी चर्चा जोर धरत आहे.

दोन्ही ठिकाणची सत्ता गेली
कसई दोडामार्ग नगरपंचायतीवर भाजपा-सेनेला बहुमत मिळाले होते. मात्र, नगराध्यक्षपदावरून भाजपा-सेनेमध्ये वाद झाले. काँग्रेसने भाजपाच्या रेश्मा कोरगावकर व सेनेच्या संध्या प्रसादी या दोन नगरसेवकांना गळाशी लावत व एका अपक्ष उमेदवाराची मदत घेत काँगे्रस-राष्ट्रवादीने काँग्रेसचे संतोष नानचे यांना नगराध्यक्ष केले व भाजपा-शिवसेनेला पाणी पाजले. एकंदरीत भाजप व शिवसेनेच्या पदाधिकाऱ्यांच्या मी पणाच्या भांडणात नगरपंचायत व पंचायत समिती या दोन्ही ठिकाणची सत्ता गेली आहे. राज्यात व केंद्रात सत्ता असताना दोडामार्गात ही घट भाजपला आत्मपरीक्षण करण्यास पुरेशी आहे.