Sindhudurg Districk Bank Election: 'दात फोडून टाकेन'; सतीश सावंत यांची भाजपाच्या महिला उमेदवाराला पोलिसांसमोर धमकी

Sindhudurg Districk Bank Election voting: तहसील कार्यालयात ही बाचाबाची झाली. प्रज्ञा ढवण,संजना सावंत ढवण आणि सतीश सावंत हे आमनेसामने आले असता त्यांच्यात काही कारणावरून वाद सुरु झाला. यावेळी पोलिसांच्या समोरच तिघांनीही एकमेकांना शिवीगाळ केली.

मुंबई/कणकवली : सिंधुदुर्ग मध्यवर्ती सहकारी बँक निवडणुकीसाठी आज मतदान होत आहे. गेल्या काही दिवसांपासून जिल्ह्यातील राजकीय वातावरण तापलेले आहे. त्यातच आज जिल्हा बँकचे माजी अध्यक्ष आणि महाविकास आघाडीचे प्रमुख सतीश सावंत आणि भाजपाच्या उमेदवार प्रज्ञा ढवण यांच्यात बाचाबाची झाली. यावेळी दोघांनीही एकमेकांना पोलिसांसमोरच शिवीगाळ केल्याने काहीकाळ तणावाचे वातावरण निर्माण झाले होते.

संतोष परब यांच्यावरील हल्ल्यात आमदार नितेश राणे यांचा हात असल्याचा आरोप शिवसेना करत आहे. आंदोलने, अटक करण्याची मागणी यामुळे जिल्ह्यात राजकीय रणधुमाळी सुरु आहे. आज नितेश राणे यांच्या अटकपूर्व जामिन अर्जावर निर्णय देण्यात येणार आहे. या पार्श्वभूमीवर आजची बाचाबाची झाल्याचे सांगितले जात आहे. 

तहसील कार्यालयात ही बाचाबाची झाली. प्रज्ञा ढवण आणि सतीश सावंत हे आमनेसामने आले असता त्यांच्यात काही कारणावरून वाद सुरु झाला. यावर सतीश सावंत यांनी जा तिकडे, असे प्रज्ञा ढवण यांना दोन तीनदा म्हटले. यामुळे ताबा सुटलेल्या ढवण यांनी सतीश सावंत यांना शिवीगाळ गेली. यावर सतीश सावंत यांनी कोणाला शीवी देतेस, असे म्हणत रागाच्या भरात शिवी घातली, तसेच दात पाडून ठेवीन अशी धमकी दिली. या बाचाबाचीचा व्हिडीओ सोशल मिडीयावर व्हायरल होऊ लागला आहे. या वेळी प्रज्ञा ढवण यांची मुलगी आणि जिल्हा परिषद अध्यक्ष संजना सावंत या देखील उपस्थित होत्या. 

सतीश सावंतांना सुरुवातीला गोट्या सावंत यांची पत्नी संजना सावंत यांनी शिवीगाळ केली. तसेच शब्द सरळ वापण्यास सतीश सावंत यांना सांगितले आहे. यानंतर ही बाचाबाची पुढे सुरु झाली.

हा प्रकार पोलिसांच्या गराड्यातच घडला आहे. अखेर पोलिसांनी हस्तक्षेप करत दोघांनाही बाजुला नेत प्रकरण मिटविले आहे. कणकवली तहसील कार्यालयाबाहेर विकास आघाडीतील पदाधिकारी व कार्यकर्ते एका बुथवर तर भारतीय जनता पार्टीचे पदाधिकारी व कार्यकर्ते दुसऱ्या बुथवर मोठ्या संख्येने उपस्थित आहेत. कणकवलीत १६५ मतदार असल्याने त्या मतदारांना मतदान केंद्रांमध्ये आणण्यासाठी करण्यासाठी दोन्ही पक्षाचे कार्यकर्ते मेहनत घेत आहेत. आतापर्यंत कणकवली ४२ मतदारांनी मतदानाचा हक्क बजावला आहे. राजकीय दृष्ट्या संवेदनशील कणकवलीत पोलिसांनी चोख बंदोबस्त ठेवला आहे.