इंदोरसह एसएनडीटी विजयी

महिला कबड्डी स्पर्धा : भारती विद्यापीठ, गडचिरोलीही विजयी

रत्नागिरी : रत्नागिरीच्या गोगटे - जोगळेकर महाविद्यालयाच्या क्रीडांगणावर सुरु असलेल्या पश्चिम विभागीय आंतरविद्यापीठ महिलांच्या कबड्डी स्पर्धेच्या दुसऱ्या दिवशी इंदोर विद्यापीठ, एसएनडीटी, भारती विद्यापीठ, मुंबई विद्यापीठ व पुणे विद्यापीठ यांनी विजय संपादन केला.
दुसऱ्या दिवशी झालेल्या पहिल्याच सामन्यात जोधपूर विद्यापीठाविरुद्ध खेळताना इंदोर विद्यापीठाच्या संघाने ९ गुणांनी विजय मिळविला. इंदोर विद्यापीठाला ३८ गुण मिळाले. दुसऱ्या सामन्यात सोलापूर संघाविरुद्ध एसएनडीटी, मुंबई संघाने २२ गुणांनी एकतर्फी विजय मिळविला. एसएनडीटी संघाला ३६ गुण मिळाले. औरंगाबाद विद्यापीठाविरुद्धच्या सामन्यात भारती विद्यापीठाने ५३ गुणांची कमाई करत ३७ गुणांनी विजय मिळविला. त्यापुढील सामना गोंडवाना विद्यापीठ गडचिरोली व एसजीबी, अमरावती यांच्यात झाला. या सामन्यात गडचिरोली संघाने ९ गुणांनी विजय मिळविला. डीएव्हीव्ही, इंदोर संघाविरुद्धच्या सामन्यात मुंबई विद्यापीठाने तब्बल ४७ गुणांनी विजय संपादीत केला. इंदोर संघाला केवळ १० गुण मिळविता आले. भारती विद्यापीठाने शिवाजी विद्यापीठाला १२ गुणांवर रोखत ४७ गुणांची कमाई करत सामना जिंकला. एसएनडीटी मुंबई संघाने नागपूर विद्यापीठाला तर गडचिरोली संघाने पुणे विद्यापीठाला नमविले. (प्रतिनिधी)