वादळी वाऱ्याने तळेबाजार, वरेरी परिसरातील बागायतदारांना फटका

देवगडमध्ये आठ दिवसांपूर्वी झालेल्या चक्रीवादळाचा फटका तळेबाजार, वरेरी परिसरातील बागायतदारांना बसला आहे.

ठळक मुद्देवादळी वाऱ्याने तळेबाजार, वरेरी परिसरातील बागायतदारांना फटकाकलमे उन्मळून पडल्याने नुकसान

देवगड : देवगडमध्ये आठ दिवसांपूर्वी झालेल्या चक्रीवादळाचा फटका तळेबाजार, वरेरी परिसरातील बागायतदारांना बसला आहे.

यात संतोष परब यांच्या बागेतील ५५ आंबा कलमे वादळी वाऱ्याने उन्मळून व मोडून पडल्याने सुमारे ९ लाखांचे नुकसान झाले आहे. देवगडमध्ये २९ रोजी सायंकाळी वादळी वाऱ्यासह पडलेल्या पावसाचा फटका आंबा बागायतदार व मत्स्यव्यावसायिकांना बसला होता.

सायंकाळी अर्ध्या तासात झालेल्या चक्रीवादळाने वरेरी गावातील बागायतदारांचे नुकसान झाले. संतोष शंकर परब यांच्या वरेरी धरणेवाडी येथील आंबा बागेतील ५५ कलमे वादळी वाऱ्याने अक्षरश: उन्मळून पडली.

यामध्ये कलमांवरील सुमारे २५० ते ३०० पेटी आंबाही पडून गेला. त्यामुळे बागायतदार परब यांचे सुमारे ९ लाखांचे नुकसान झाले आहे. याशिवाय इतर बागायतदारांचेही नुकसान झाले असून तलाठी गुरव व कृषी सहाय्यक एस्. बी. जाधव यांनी बागेत जाऊन नुकसानीचा पंचनामा केला.

परब यांच्या बागेतील मोठी झाडे वादळी वाऱ्याने जमीनीवर कोसळली. एकीकडे कोरोनाच्या पार्श्वभूमीवर व वारंवार बदलत्या हवामानामुळे संकटात सापडलेला बागायतदार दुसरीकडे हंगामाच्या अंतिम टप्प्यात वादळी वाऱ्याने झालेल्या नुकसानीमुळे हवालदिल झाला आहे.