एक्स्प्रेसच्या धडकेनं दुचाकी २० फुटांवर जाऊन पडली; तरुण थोडक्यात बचावला; पाहा VIDEO

सुदैवानं तरुणाचा जीव वाचला; दुचाकीला एक्स्प्रेसची जोरदार धडक

अति घाई संकटात नेई असं म्हणतात. अनेकांना ही गोष्ट कळते, पण वळत नाही. अशी मंडळी मग संकटात सापडतात. जी वेळ ही मंडळी वाचवायला जातात, ती वेळच या मंडळींना असा काही दणका देते की त्यातून त्यांना आयुष्यभराचा धडा मिळतो. सध्या सोशल मीडियावर व्हायरल झालेल्या एका व्हिडीओमुळे याचाच प्रत्यय आला आहे.

तारीख- १२ फेब्रुवारी.. वेळ- संध्याकाळची.. ६ वाजून १८ मिनिटांची.. एक्स्प्रेस ट्रेन जात असल्यानं सगळेजण फाटकाजवळ थांबले होते. मात्र तेवढ्यात एक तरुण दुचाकी घेऊन रुळ ओलांडण्याचा प्रयत्न करू लागला. तो जवळपास मध्यापर्यंत पोहोचला. मात्र तोल गेल्यानं त्याची दुचाकी खाली पडली. तोदेखील कोसळला. तितक्यात भरधाव वेगानं एक्स्प्रेस ट्रेन त्याच्या दिशेनं आली.

एक्स्प्रेसची दुचाकीला जोरदार धडक; अति घाई तरुणाला महागात पडली, जीव थोडक्यात वाचला https://t.co/CbvSFUjpi9pic.twitter.com/oVIbuRgk9p

— Lokmat (@lokmat) February 15, 2022

तरुणाची दुचाकी रेल्वे रुळांवरून पडून होती. एक्स्प्रेस ट्रेन पाहून तरुण पळू लागला. तितक्यात एक्स्प्रेसनं दुचाकीला धडक दिली. दुचाकी जवळपास १५ ते २० फूट दूर जाऊन पडली. दुचाकीला धडक बसली त्यावेळी तरुण पडलेल्या दुचाकीवरच असल्यानं त्यालाही थोडी दुखापत झाली. मात्र त्याचा जीव वाचला. या घटनेचा व्हिडीओ सध्या सोशल मीडियावर व्हायरल होत आहे.