Video : गाढवाने मालकाच्या सुरात मिसळला सूर, व्हिडीओ पाहून हैराण झाले लोक!

तुम्ही कधी गाढवाला गाणं गाताना ऐकलंय का? नाही ना...मग हा व्हिडीओ पाहिल्यावर तुम्ही आश्चर्याचकितही व्हाल आणि तुम्हाला धक्काही बसेल. सध्या हा व्हिडीओ सोशल मीडियात व्हायरल झाला आहे. कारण या व्हिडीओमध्ये एका गाढवाने त्याच्या मालकाच्या सुराला ताल दिला आहे. 

हा व्हिडीओ एक आठवड्यापूर्वीचा आहे. अमेरिकेच्या दक्षिण कॅरोलिना येथे राहणाऱ्या ट्रेव्हिस किनले याने हा व्हिडीओ त्याच्या फेसबुक अकाऊंटवर शेअर केला आहे. या व्हिडीओत ट्रेव्हिस एका गाढवासोबत आणि घोड्यासोबत दिसत आहे. ट्रेव्हिस अचानक 'द लायन किंग' सिनेमातील टायटल गाणं गायला सुरूवात करतो. त्यानंतर गाढवही लगेच त्याच्या सुरात सूर लावतो.

मीडिया रिपोर्ट्सनुसार, हा अनोखा गाढव आधी नॅथन नावाच्या एका व्यक्तीकडे होता. पण तो या गाढवामुळे फार हैराण झाला होता, त्यामुळे हा गाढव त्याने ट्रेव्हिसला १०० डॉलरमध्ये विकला. आता ट्रेव्हिसला या गाढवाचा एक वेगळा अंदाज बघायला मिळाला आहे. गाढवाचं हे म्युझिक टॅलेंट आतापर्यंत ३७ लाख लोकांनी पाहिलंय.