होणाऱ्या पत्नीलाच घेऊन पळाला; कारण ऐकून पोलिसांसह सर्वच हैराण

मुलीच्या वडिलांनी पोलीस ठाणे गाठले. पोलिसांच्या दबावामुळे दोघे २ डिसेंबरला पानापूरला परतले.

पटना - होणाऱ्या पत्नीलाच घेऊन तरुण पळून गेल्याची घटना बिहारच्या सारण पानापूरमधून समोर आली आहे. हा प्रकार घरच्यांना समजताच त्यांनाही धक्का बसला. मुलीच्या वडिलांनी पोलीस ठाणे गाठले. याप्रकरणी गुन्हाही दाखल झाला होता असे समजते. बराच शोध घेतल्यानंतर अखेर दोघे पोलीस ठाण्यात शरण आले. पोलिसांना त्यांनी पळून जाण्याचे कारण सांगितले ते ऐकून उपस्थित सर्वांनाच आश्चर्याचा धक्का बसला. 

राम रुद्रपूर गावात संध्या नावाच्या मुलीचे लग्न अकबरपूर गावातील बोलबम साहनीसोबत निश्चित झाले होते. साखरपुडाही झाला, त्यानंतर दोघांचे फोनवर तासन्- तास बोलणे सुरु झाले. मग एकमेकांशिवाय क्षणभर राहणेही शक्य नाही यावर दोघांचे एकमत झाले, पण लग्न पुढच्या वर्षी होणार होते. त्यामुळे दोघांनी प्लॅन केला आणि ८ नोव्हेंबरला कोणालाही न सांगता पळून गेले.

मुलीच्या वडिलांनी पोलीस ठाणे गाठले. पोलिसांच्या दबावामुळे दोघे २ डिसेंबरला पानापूरला परतले. पुढच्या वर्षी लग्नाची तारीख होती. पण, दोघांनाही लवकर लग्न करायचे होते, तर घरातील लोक उशीर करत होते. त्यामुळे पळून जाण्याचा निर्णय घेतला, असे त्यांनी सांगितले. हे एकून घरातले लगेच लग्नासाठी तयार झाले. स्थानिक पोलीस ठाण्याच्या उपनिरीक्षक रुपम कुमारी यांनी रामजानकी मंदिरात नातेवाईकांच्या उपस्थितीत त्यांचे लग्न लावून दिले. दोघेही लग्नानंतर खूश आहेत. तर, सोशल मीडियासह परिसरातही प्रकरणाची जोरदार चर्चा रंगलीय.