हे प्रभु हे हरिराम...! व्ह्यूजसाठी ब्रेडसोबत चिखल खाताना दिसला एक्स बिग बॉस कंटेस्टंट...

Viral Video : लोकांचं लक्ष आकर्षित करण्यासाठी अजब अजब कारनामे करत असतो. यावेळी तर त्याने विचित्रपणाचा कळसच केला. तो रस्त्यावर झोपून ब्रेडसोबत चिखल खाताना दिसला.

Viral Video : आजकाल सोशल मीडिया इन्फ्लुएन्सर व्ह्यूज मिळवण्यासाठी काय काय करतील काहीच सांगता येत नाही. अनेकजण तर व्ह्यूजसाठी सगळ्या सीमा पार करतात. याचंच एक ताजं उदाहरण म्हणजे एक्स बिग बॉस कंटेस्टंट सोशल मीडिया इन्फ्लुएन्सर पुनीत सुपरस्टार याचा व्हिडीओ. तो लोकांचं लक्ष आकर्षित करण्यासाठी अजब अजब कारनामे करत असतो. यावेळी तर त्याने विचित्रपणाचा कळसच गाठला. तो रस्त्यावर झोपून ब्रेडसोबत चिखल खाताना दिसला. त्याचा हा व्हिडीओ पाहून यूजर्सनी त्याला वेड्यात काढलं आहे. 

सोशल मीडिया प्लॅटफॉर्म इन्स्टाग्रामवर हा व्हिडीओ व्हायरल झाला आहे. ज्यात तो ब्रेडसोबत रस्त्यावर साचलेला चिखल खाताना दिसत आहे. व्हिडिओत पुनीत रस्त्यावर चिखलात लेटून आहे आणि ब्रेडसोबत मिचक्या घेत चिखल खात आहे. त्याचा हा व्हिडीओ पाहून किळस तर येतोच, सोबतच त्याचा मूर्खपणाही दिसून येतो.

पुनीतचा हा व्हिडीओ पाहून यूजर्सनी पुन्हा एकदा कपाळावर हात मारून घेतला आहे. इन्स्टाग्रामवर या व्हिडिओला आतापर्यंत १६.८ लाखांपेक्षा जास्त व्ह्यूज मिळाले आहेत. साधारण २८ हजारांपेक्षा जास्त लोकांनी व्हिडिओला लाइक केलंय. व्हिडिओवर लोक वेगवेगळ्या प्रतिक्रिया देत आहेत. एकाने लिहिलं की, "काय काय बघावं लागत आहे. कसे कसे लोक आहेत पृथ्वीवर".