Preity Zinta with Husband, IPL 2022 PBKS vs RR: प्रिती झिंटाचा पती पहिल्यांदाच स्टेडियममध्ये; उड्या मारून आनंदाने केला जल्लोष

राजस्थानचा पंजाबवर शेवटच्या षटकात विजय

Preity Zinta with Husband, IPL 2022 PBKS vs RR: पंजाब किंग्ज विरूद्धच्या सामन्यात राजस्थान रॉयल्सने शेवटच्या षटकात सहज विजय मिळवला. जॉनी बेअरस्टोचे दमदार अर्धशतक (५६) आणि जितेश शर्माची शानदार फटकेबाजी (३८*) यांच्या बळावर पंजाबने २० षटकांत राजस्थानला १९० धावांचे आव्हान दिले होते. या आव्हानाचा पाठलाग करताना सलामीवीर यशस्वी जैस्वालने सुरेख अर्धशतक झळकावत विजयाचा पाया घातला. तर शिमरॉन हेटमायरने (३१*) लौकिकाला साजेशी फटकेबाजी करत राजस्थानला विजय मिळवून दिला.

पंजाब किंग्जची सहमालक प्रीती झिंटा ही अनेकदा सामना पाहण्यासाठी स्टेडियममध्ये उपस्थित राहली आहे. पण शनिवारच्या सामन्यात प्रिती झिंटाचा पती जीन गुडनॉफदेखील तिच्यासोबत सामन्यासाठी उपस्थित राहिला होता. पंजाब किंग्जचा संघ प्रथम फलंदाजी करत असताना या जोडप्याने खेळाचा आनंद लुटला आणि संघाला चीअर करत जल्लोष केला. जेव्हा लियम लिव्हिंगस्टोनने त्याच्या डावातील पहिला षटकार मारला, तेव्हा तर प्रीती झिंटा आणि तिचा नवरा जीन गुडनॉफ आनंदाने उड्या मारून जल्लोष करताना दिसले. पाहा Video-

प्रीती झिंटा आणि जीन गुडनॉफ हे काही दिवसांपूर्वीच आई-बाबा झाले. प्रितीच्या घरी गोंडस जुळ्या मुलांचा जन्म झाला. प्रीती आणि जीन यांचा विवाह २०१६ साली झाला होता. जीन गुडनॉफ हा एका आंतरराष्ट्रीय कंपनीत उच्चपदस्थ अधिकारी आहे. या मोसमाच्या सुरुवातीला प्रिती झिंटा आपल्या संघाला चीअर करण्यासाठी पोहोचू शकली नाही. पण गेल्या दोन-तीन सामन्यांपासून ती सतत आपल्या संघाला चिअर करण्यासाठी पोहोचत आहे. तशातच शनिवारी तिच्यासोबत तिच्या नवऱ्यानेही हजेरी लावली. परंतु, प्रितीच्या संघाला पराभवाचे तोंड पाहावे लागले.