Wedding Invitation: जरा हटके! नवरदेवानं छापलेल्या लग्न पत्रिकेची गावभर चर्चा, घरोघरी जाऊन वाटलं 'आधार कार्ड'

Wedding Invitation Ideas: आधार कार्डच्या रुपात छापण्यात आलेली लग्न निमंत्रण पत्रिका सध्या चर्चेचा विषय बनली आहे. सोशल मीडियात ही हटके पत्रिका व्हायरल झाली आहे. 

Aadhar Card Wedding Invitation: लग्न आपल्या आयुष्यातील खूप महत्वाचा क्षण असतो आणि तो खास असावा यासाठी प्रत्येकजण काही ना काही विशेष प्रयत्न करतो. आपलं लग्न खास बनवण्यासाठी प्रत्येकजण खास तयारी आणि प्लॅनिंग करतो. याचे अनेक व्हिडिओ देखील तुम्ही सोशल मीडियावर पाहात आले असाल. लग्नाची निमंत्रण पत्रिका देखील हटके अंदाजात छापण्याचा काहींचा प्रयत्न असतो. अशीच एक हटके आणि लक्षवेधी लग्न पत्रिका सध्या चर्चेचा विषय बनली आहे. 

एका जोडप्यानं त्यांच्या लग्नासाठी 'आधार कार्ड'च्या थीमवर तयार केलेलं निमंत्रण तयार केलं आहे. ज्यास लोकांची चांगली पसंती देखील मिळत आहे. या आधार कार्डवर लग्नाच्या निमंत्रणाचा संपूर्ण तपशील खूप हटके पद्धतीनं छापण्यात आला आहे. यात आधार क्रमांकाऐवजी लग्नाची तारीख छापण्यात आली आहे, त्यासोबत बारकोडही देण्यात आला आहे. 

हे कार्ड सोशल मीडियावर खूप व्हायरल होत आहे, यासोबतच लोकांना ही क्रिएटिव्ह आयडिया खूप आवडली आहे. संबंधित व्यक्तीनं फक्त डिजिटल कार्ड तयार केल्याचं सांगितलं जात आहे. मिळालेल्या माहितीनुसार, हे कार्ड छत्तीसगडच्या जशपूर जिल्ह्यातील फरसाभर ब्लॉकमधील अंकिरा गावातील रहिवासी लोहित सिंह नावाच्या तरुणाचं असल्याचं सांगितलं जात आहे. लोहित सिंह अंकिरा गावात एक जनसेवा केंद्र चालवतात, जिथं लोकांचं आधार कार्ड बनवलं जातं. यासोबतच लोहित सिंग इंटरनेट, छपाई, फोटो कॉपी आणि लग्नपत्रिका छपाईचंही काम करतात.