रंगभवन चौकातील १५ फर्निचरची दुकाने आगीत भस्मसात

सोमवारी पहाटेची घटना; जिवितहानी नाही, लाखोंची घरसजावटीचे साहित्य जळून खाक

ठळक मुद्दे- फर्निचरच्या दुकानांना आग लागल्याने लाखो रूपयांचे नुकसान- आगीची माहिती समजताच आमदार प्रणिती शिंदे यांनी दिली भेट- घटनेनंतर पोलीसांकडून पंचनामा करण्याचे काम सुरू

सोलापूर : शहरातील रंगभवन परिसरात असलेल्या फस्ट चर्चसमोरील १५ फर्निचरच्या दुकानांना आग लागून लाखों रूपयाचे नुकसान झाले आहे़ ही घटना सोमवारी पहाटे तीनच्या सुमारास घडली. या घटनेत कोणत्याही प्रकारची जिवितहानी झाली नसल्याचे पोलीसांनी सांगितले.

सोमवारी पहाटे रंगभवन परिसरात आग लागल्याची माहिती अग्निशामक दलास मिळाली. त्यानंतर अग्निशामक दलाच्या दोन गाड्या रंगभवन परिसरात दाखल झाल्या़ त्यानंतर फस्ट चर्चसमारील फर्निचरच्या दुकानांना लागलेली आग अग्निशामक दलाच्या पथकाने पाण्याचा मारा करीत विझविली़ दरम्यान अग्निशामक दलाने पाठीमागील बाजूस असलेली दुकाने आगीपासून वाचविण्यात यश मिळविले.

 मागील काही वर्षापासून रंगभवन परिसरात ही फर्निचरची दुकाने आहेत. याठिकाणी फर्निचर, शोभेच्या वस्तू, घर सजावटीसाठी लागणारे विविध साहित्य याठिकाणी मिळतात़ पहाटे सहापर्यंत आग विझविण्याचे काम सुरूच होते़ या घटनेची माहिती मिळताच आमदार प्रणिती शिंदे यांनी घटनास्थळांला भेट देऊन पाहणी केली. यावेळी शहर पोलीस दलातील अधिकारी व कर्मचारी उपस्थित होते.