रांझणीत २ लाखांची देशी दारू जप्त; दोघांविरुद्ध गुन्हा

रांझणी (ता. पंढरपूर) येथील आवताडे वस्तीजवळ एक इसम अवैधरीत्या देशी दारू विकत असल्याची बातमी उपविभागीय पोलीस अधिकारी विक्रम कदम यांना मिळाली. त्यानुसार त्यांनी पोलिसांचे पथक रांझणीत पाठवले. यावेळी प्रदीप बाळासाहेब आवताडे हा अवैधरीत्या देशी दारू विक्री करताना मिळून आला. त्याला ताब्यात घेऊन विचारपूस केली असता त्याने घराजवळ ठेवलेला अवैध दारूसाठा दाखविला. हा दारूसाठा नागेश प्रकाश ढोले याच्या वाहनातून आणल्याचे सांगितले.

या कारवाईत देशी दारु १८० मि.ली.च्या एकूण ३३६० बॉटल (७० बॉक्स) असा २ लाख १ हजार ६०० रुपये किमतीचा मुद्देमाल जप्त केला आहे. याप्रकरणी प्रदीप बाळासाहेब आवताडे, नागेश प्रकाश ढोले (रा. रांझणी, ता. पंढरपूर) यांच्याविरुद्ध गुन्हा नोंद केला आहे.

ही कारवाई उपविभागीय पोलीस अधिकारी विक्रम कदम यांच्या मार्गदर्शनाखाली उप.पो.नि. हमीद शेख, पोना नीलेश रोंगे, पोकॉ लोंढे, पोकॉ शिवशंकर हुलजंती यांनी केली.

----