मोठी बातमी! रंगभवन चौकातील फर्निचरच्या दुकानांना लागली मोठी आग

या आगीत कपाट, सोफासेट, दिवाना पलंग, रॅक यासह अन्य लाकडी साहित्य, सजावटीचे साहित्य, फुले व अन्य माल आगीत जळून खाक झाला आहे.

सोलापूर : शहरातील रंगभवन चौकात असलेल्या फर्निचरसह अन्य सहा दुकानांना सोमवारी दुपारी तीन वाजता अचानक आग लागली. या आगीत लाखो रूपयांचे नुकसान झाल्याची प्राथमिक माहिती समोर आली आहे.

रंगभवन चौकात फर्निचरसह अन्य सजावटीच्या साहित्यांची दुकाने आहेत. गेल्या काही वर्षापासून या भागात दुकानांची संख्या मोठी असल्याने खरेदीसाठी नागरिकांची गर्दीही मोठी होती. सण, उत्सव काळात या दुकानांना जास्त गर्दी असते. साेमवारी दुपारी तीन वाजता अचानक आग लागली. या आगीचे लोळ उंचच्या उंच गेल्याने दूरपर्यंत आगीचे लोळ दिसून येत होते. आगीच्या घटनेनंतर बघ्यांची गर्दी मोठया प्रमाणात झाली होती. या आगीत कपाट, सोफासेट, दिवाना पलंग, रॅक यासह अन्य लाकडी साहित्य, सजावटीचे साहित्य, फुले व अन्य माल आगीत जळून खाक झाला आहे. या आगीची माहिती मिळताच सोलापूर महानगरपालिकेच्या अग्निशामक दलाच्या गाड्या घटनास्थळी दाखल झाल्या असून आग विझविण्याचे काम वेगाने सुरू आहे.

सोलापूर शहरातील रंगभवन चौकात असलेल्या फर्निचरसह अन्य सहा दुकानांना लागली आग #Solapurpic.twitter.com/7foXLpVECa

— Lokmat (@lokmat) October 16, 2023