हिंगोलीहून पंढरपूरला निघालेला टेम्पो चालकाच्या डुलकीमुळे उलटला; अपघातात एक ठार, तेरा जखमी

कुर्डूवाडी-शेटफळ रस्त्यावरील घटना.

दीपक दुपारगुडे, सोलापूर : हिंगोली जिल्ह्यातून पंढरपूरकडे निघालेला टेम्पो चालकास लागलेल्या डुलकीमुळे उलटला. अपघातामध्ये एक ठार तर तेरा जण जखमी झाले. हा अपघात कुर्डूवाडी-शेटफळ रस्त्यावरील बावी गावच्या शिवारात झाला.

पुण्यतिथीच्या निमित्ताने आयोजित केलेल्या कार्यक्रमासाठी वरूड (ता. सेनगाव) येथून टेम्पो (एम. एच.-३८, एक्स -१४४७ ) मधून प्रवास करत असतानाच कुर्डूवाडी-शेटफळ रस्त्यावरील बावी (ता. माढा, जि. सोलापूर) येथील शिवारातील सिद्धेश्वर मंदिराजवळ पोहोचला असता चालकाला लागलेल्या डुलकीमुळे गुरुवारी सकाळी तो रस्त्याच्या कडेला अचानकपणे उलटल्याने त्यात एक जणाचा जागीच मृत्यू झाला. तर १३ जण या अपघातात जखमी झाल्याची घटना घडली आहे. यात जयजयराम काशीराम शिंदे (वय-३५ दाताळा, ता.सेनगाव) यांचा जागीच मृत्यू झाला.

सर्व जखमींना कुर्डूवाडी येथील ग्रामीण रुग्णालयात उपचारासाठी दाखल करण्यात आले. यातील काहीजण गंभीर जखमी असल्याने त्यांना सोलापूर येथील सिव्हिल हॉस्पिटलला रुग्णवाहिकेने हलविण्यात आले. घटनास्थळाला कुर्डूवाडी पोलिस ठाण्याचे पोलिस उपनिरीक्षक हनुमंत वाघमारे यांनी भेट देऊन पाहणी केली.

या अपघातात अर्चना केळे ( वय २२ रा. जानरुण रोडगे, ता. सेनगाव), देहुबाई ज्ञानोबा दरोगे (वय ५० रा. दाताळा, ता.सेनगाव), प्रभावती जयजयराम शिंदे (वय ३० दाताळा, ता. सेनगाव), कानबा अंबर दरोगे (वय ६० रा.दाताळा, ता.सेनगाव), ज्ञानेश्वर विठ्ठल केळे (वय २७, रा.जानरुण रोडगे), भास्कर गेनुजी गाडे (वय ४० रिधोरा, ता.सेनगाव), सुधाकर दाजीबा कोटकर (वय ५०,वरुड, ता.सेनगाव), सरस्वती गजानन शिंदे (वय ३०, रा.दाताळा, ता.सेनगाव),रुक्मिणी विठ्ठल केळे (रा. कंकरवाडी, ता.सेनगाव), चंद्रभागा संतोष नलवडे (वय ३४, तरडगाव, ता.सेनगाव), प्रयागाबाई संजय सरकटे (वय ४०, रा .समगा, ता.सेनगाव), गजानन कौतिका शिंदे (वय ३६, रा.दाताळा, ता.सेनगाव) अशी जखमी झालेल्यांची नावे आहेत.