अक्कलकोटच्या बाप्पाचा आंध्रात रुबाब!

लोकमत न्यूज नेटवर्क

अक्कलकोट : गणेश प्रतिष्ठापनेसाठी अक्कलकोट तालुक्यात तब्बल ९० हजार गणेश मूर्ती तयारीचे काम सुरू असून, हे काम अंतिम टप्प्यात आले आहे. महाराष्ट्रातल्या कानाकोपऱ्यात आणि कर्नाटक आणि आंध्र प्रदेशमध्येही या मूर्तींचा रुबाब दिसणार आहे. त्यासाठी कारागिरांकडून त्यावरून अखेरचा हात फिरवला जात आहे.

यंदा ६ सप्टेंबर रोजी गणेश मूर्ती प्रतिष्ठापना होत आहे. अक्कलकोट शहरातील कुंभार गल्लीत गणेश मूर्ती दरवर्षी बनवण्याचे काम कलाकार करताहेत. त्याठिकाणी जागेची कमतरता भासत असल्याने हा व्यवसाय गाणगापूर रोडवरील औद्योगिक वसाहतीत हलविण्यात आला आहे. मागील तीन पिढ्यांपासून हा व्यवसाय सुरू आहे. यंदाही लाखो मूर्तींचे काम अंतिम टप्प्यात आहे. या कामात असंख्य कारागीर गुंतलेले आहेत.

----

सहा फुटांपर्यंतच्या मूर्ती

अक्कलकोट औद्योगिक वसाहत ही आता गणेश नगर बनली आहे. आठ कुटुंब तीन पिढ्यांपासून मूर्ती बनविण्याचे काम करते आहे. दरवर्षी घरगुती, सार्वजनिक मंडळ असे जवळपास ९० हजार ते १ लाख मूर्ती बनवतात. १ फूट ते ६ फुटांपर्यंत या मूर्ती बनवल्या जातात. त्या शेडूच्या बनवल्या जात असल्या तरी मागणी प्लास्टरच्या मूर्तीला अधिक आहे. गणेश मूर्ती आंध्र प्रदेश, हैदराबाद, कर्नाटक या येथे विक्रीस जातात. याशिवाय स्थानिक पातळीवर उमरगा, सांगोला, मंगळवेढा येथून सर्वाधिक मागणी आहे.

---

दरवर्षी लाखो मूर्ती बनवल्या जातात. महाराष्ट्रासह परराज्यात विक्रीला जातात. सध्या हे काम अंतिम टप्प्यात असून, लवकरच त्या परराज्यात जातील. आठ कुटुंबातील कारागीर वर्षभर काम करतात.

- भीमाशंकर कुंभार

कारागीर

----

फोटो : २० अक्कलकाेट

अक्कलकोट येथे गणेश मूर्तीवर शेवटचा हात फिरवताना भीमाशंकर कुंभार आणि त्यांचे कुटुंब.