शिवशाही बस अपघातात दुचाकीस्वार जखमी

टेंभुर्णी- करमाळा मार्गावर झरे फाट्याजवळ शिवशाही एसटी बस व मोटारसायकलचा अपघात झाला.

काशिनाथ वाघमारे, सोलापूर : टेंभुर्णी- करमाळा मार्गावर झरे फाट्याजवळ शिवशाही एसटी बस व मोटारसायकलचा अपघात झाला. या अपघातात दुचाकीस्वार जखमी झाला  आहे. हयगयीने वाहन चालवून अपघाताला कारणीभूत झाल्याप्रकरणी करमाळा पोलिसांनी मोटार सायकलचालकाविरुद्ध गुन्हा दाखल केला आहे.

करमाळा-टेंभुर्णी मार्गावर २० एप्रिल रोजी सायंकाळी ६ वाजण्याच्या सुमारास हा अपघात झाला. अपघातातील दुचाकीस्वाराचे नाव समजू शकलेले नाही. पोलिस सूत्राकडील माहितीनुसार शिवशाही एसटी बस सोलापूरहून धुळ्याला जात होती. ती झरे फाटा येथे येताच करमाळ्याहून जेऊरकडे जाणाऱ्या एका मोटारसायकलने साईटपट्टीवरून येऊन जोरात धडक दिली. त्यात एसटीचे नुकसान झाले आहे. मोटारसायकल स्वार देखील जखमी झाला. त्याला रुग्णालयात दाखल करण्यात आले आहे. याप्रकरणी एसटी बस चालक बाळू ज्ञानदेव वायभासे (वय ४८, रा. माधवबाग, भिंगार, नगर) यांनी फिर्याद दिली आहे.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"