बसवकल्याणजवळ कारचा अपघात; सोलापुरातील एक जण ठार, पाच जण जखमी

घटना रविवारी पहाटेच्या सुमारास घडली

सोलापूर : कर्नाटक राज्यातील हैद्राबाद-सोलापूर रोडवर बसवकल्याणजवळ कारचा अपघात झाला. या अपघातात एक जण जागीच ठार तर  एकाच घरातील पाच जण जखमी झाल्याची घटना रविवारी पहाटेच्या सुमारास घडली. 

जयवंत (नाथा) भास्कर जोशी (वय ३२, रा. उत्तर कसबा, जोशी गल्ली, सोलापूर) असे अपघातात मृत पावलेल्या व्यक्तीचे नाव आहे. याबाबत पोलिसांनी दिलेली माहिती अशी की, उत्तर कसब्यातील जोशी कुटुंबिय हे देवदर्शनासाठी तांडूर (कर्नाटक) गेले होते. परत येताना हैदराबाद-सोलापूर राष्ट्रीय महामार्गावरील बसवकल्याण येथे डिझेल भरून पंपातून गाडी रस्त्यावर येत असताना पाठीमागून येणारा भरधाव वेगातील ट्रकने जोराची धडक दिली.

दरम्यान, या धडकेत एक जण ठार तर अन्य पाच जण जखमी झाले आहेत. जखमींवर सोलापुरातील खासगी रूग्णालयात उपचार सुरू आहेत. जयवंत (नाथा) जोशी यांच्या पश्चात आई, दोन भाऊ, दोन बहिणी असा परिवार आहे. त्यांच्यावर जुना पुना नाका येथे अंत्यसंस्कार करण्यात येणार आहेत.