अक्कलकोटजवळ कार अन् दुचाकीचा अपघात; एक जण ठार, दोघे गंभीर जखमी

सोलापूर लोकमत ब्रेकिंग

अक्कलकोट : अक्कलकोट तालुक्यातील शिरवळ जवळ कुंभार यांच्या शेताजवळील वळणावर कार व दुचाकीच्या भीषण अपघातात एक तरुण जागीच ठार झाला तर दोघेजण गंभीर जखमी झाले आहेत. ही घटना शुक्रवार ५ नोव्हेंबर रोजी सायंकाळी ८ वाजता घडली आहे. या घटनेत सिद्धाराम भिमाशंकर कोळी (वय २८ रा सदलापूर) असे मृत व्यक्तीचे नाव आहे.याबाबत उत्तर पोलीस ठाण्यात गुन्हा दाखल करण्यात आला आहे.

अधिक माहिती अशी की, मयत सिद्धाराम भिमाशंकर कोळी वय २८ रा सदलापूर हा सकाळी ११ वाजता त्याच्या मुलीचे जावळ काढण्यासाठी राजकुमार विश्वनाथ भोसगी व गजानन रामलिंग मुलगे दोघे राहणार सदलापूर या दोन्ही मित्रासोबत एकाच दुचाकीवरून वागदरी (ता. अक्कलकोट) येथे गेले होते.जावळ कार्यक्रम उरकून गावाकडे परतीचा प्रवास करीत असताना कुंभार यांच्या शेताजवळील वळणावर समोरून येणाऱ्या भरघाव वेगाने चार चाकी महिंद्रा कार क्र. एम एच ०५ इ ए ५०५८ समोरून दुचाकीस्वाराना जोरात धडक दिल्याने दुचाकीवरील तिघेजण खाली पडून गंभीर जखमी झाले. त्यापैकी मयत सिद्धाराम भिमाशंकर कोळी (वय २८) यास डोक्यास गंभीर मार लागल्याने जागीच ठार झाला. तर सोबत असलेले राजकुमार विश्वनाथ भोसगी  याच्या पायाला गंभीर दुखापत तर गजानन रामलिंग मुलगे याच्या हाताला गंभीर मार लागला आहे. त्या दोघांना सोलापूर येथील शासकीय रुग्णालयात पुढील उपचारासाठी दाखल करण्यात आले आहे. 

या अपघातात दुचाकी व चारचाकी वाहनाचे मोठे नुकसान झाले असून कार मधील ४ जण जखमी झाले आहेत.कार चालक घटनास्थळावरून फरार झाला आहे. याच रस्त्यावर दुपारी १ च्या सुमारास अपघातात ६ वर्षीय चिमुकलीने प्राण गमावले आहे. त्यानंतर सायंकाळी हा दुसरा अपघात झाला आहे. यामध्ये ही एक तरुणाने प्राण गमावले तर दोघेजण गंभीर जखमी झाले आहेत.या घटनेची फिर्याद मोठा भाऊ मल्लिकार्जुन भिमाशंकर कोळी यांनी अक्कलकोट उत्तर पोलीस ठाण्यात दिली आहे. अधिक तपास सपोनि महेश भावीकट्टी हे करीत आहेत.