सतत सीमकार्ड बदलत पोलिसांना चकवा;

लोकमत न्यूज नेटवर्क

पुणे ग्रामीण पोलिसांच्या स्थानिक गुन्हे अन्वेषण शाखेच्या अधिकारी कर्मचाऱ्यांनी मोठ्या कौशल्याने कारवाई करीत भोंदूबाबा मनोहरमामा भोसले यास सातारा जिल्ह्यातील फलटण तालुक्यातील सालपे गावी जेरबंद केले.

या गुन्ह्याच्या तपासामध्ये पोलीस अधीक्षक अभिनव देशमुख यांच्या नेतृत्वाखाली स्थानिक गुन्हे शाखेचे एक विशिष्ट पथक नेमण्यात आले होते. त्यानंतर गुन्ह्यातील आरोपींचा पथकाने तत्काळ शोध घेण्यास सुरुवात केली. पोलिसांच्या माहितीनुसार मनोहरमामा भोसले याचा तो वापरत असलेल्या मोबाइलवरून माग काढण्यात आला. त्यात तो सतत कार्ड बदलत होता. गुुरुवारी (दि ९) रात्रीच त्याचा माग काढण्यात पोलिसांना यश आले होते. त्यानंतर फलटण तालुक्यातील सालपे गावातील फार्महाऊसवर पथकातील पोलीस पोहचले. हे फार्महाऊस एका डोंगरावर निवांत ठिकाणी आहे. पोलीस पोहचले तेव्हा मामा भोसले एका खुर्चीवर निवांत बसला होता. यावेळी तो मोबाइलवर बोलण्यात व्यस्त होता. पोलीस या ठिकाणी खासगी वाहनातून पोहचले. पोलिसांना पाहताच मनोहरमामाला धक्काच बसला. पोलिसांनी दाखल गुन्ह्याची माहिती देत कारवाईची माहिती दिली. त्यावर ‘चला येतो’ म्हणत तो पोलिसांबरोबर गाडीत बसून बारामती ग्रामीण पोलीस ठाण्यात पोहोचला. यावेळी कायदेशीर प्रक्रिया पार पाडत त्याला वैद्यकीय तपासणीसाठी नेण्यात आले.

पोलिस अधीक्षक अभिनव देशमुख यांच्या नेतृत्वाखाली अप्पर पोलीस अधीक्षक मिलिंद मोहिते, बारामती विभाग प्रमुख नारायण शिरगावकर यांचे मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक अशोक शेळके, पोलीस निरीक्षक महेश ढवाण, सहायक पोलीस निरीक्षक संदीप येळे, पोलीस उपनिरीक्षक शिवाजी ननवरे, पोलीस हवालदार विजय कांचन, अजय घुले, राजू मोमीन, पोलीस कॉन्स्टेबल धीरज जाधव यांनी ही कारवाई केली.