मुलाला गळफास देऊन माता-पित्याला केली मारहाण

कुर्डूवाडी : एका विवाहितेच्या नातलगांनी मुलाला गळफास देऊन त्याच्या माता-पित्याला आणि काका-मावशीला जबर मारहाण केल्याचा प्रकार लव्हे येथे घडला आहे. या मारहाणीत हल्लेखोरांनी मोबाईल आणि गळ्यातील गंठण पळविले. याप्रकरणी कुर्डूवाडी पोलिसांनी चौघांविरुद्ध गुन्हा दाखल केला आहे.

याबाबत सुब्राव कदम (रा. लव्हे, ता. माढा) यांनी कुर्डुवाडी पोलिसांत फिर्याद दिली आहे. पोलीस सूत्राकडील माहितीनुसार, दोन महिन्यांपूर्वी एका विवाहितेच्या वडिलाने सुब्राव कदम यांना बोलावून दोघांच्या मुलांचे प्रेमसंबंध असल्याचे सांगितले. मुलाला ताकीद देण्याबाबत बजावले होते. त्यानंतर कदम हे २५ मे रोजी गावात नृसिंह मंदिरात नारळ फोडायला जात असताना मुलीच्या नातेवाइकांतील चौघेजण आले आणि सुब्राव यांना मुलगा कुठे आहे असे विचारले. यावर तो रानात असल्याचे सांगितले. त्यावेळी संशयित हल्लेखोराने त्यांना मारहाण करण्यास सुरुवात केली. त्यातून त्यांनी घराकडे धाव घेत मुलाला घरात बसण्यास सांगितले. हल्लेखोरांनी त्यांचा पाठलाग करीत घर गाठले आणि पुन्हा कदम आणि त्यांच्या पत्नीला मारहाण करू लागले. यावेळी कमद यांचे मावस भाऊ आणि त्यांची पत्नी हे सोडवायला आले असता त्यांनाही मारहाण केली. मारहाण करणाऱ्यांपैकी एकाने सुब्राव यांचा मोबाईल आणि पत्नीच्या गळ्यातील गंठण काढून घेतले. यावेळी बंद खोली उघडून सारेजण खोलीत शिरले. लपलेल्या मुलाला गळफास देऊन निघून गेले. सुब्राव यांनी छताला लटकलेल्या मुलाला खाली सोडविले आणि त्याला कुर्डूवाडी येथील खासगी दवाखान्यात दाखल केले.

...............