दोघांना ट्रकखाली चिरडणाऱ्या अपघातातील चालकावर गुन्हा

जाबीर दाऊद अली (वय २५, रा. राम-रहीम कॉलनी, गाव सेंधवा, जि. बडवानी, राज्य- मध्यप्रदेश) असे गुन्हा दाखल झालेल्या चालकाचे नाव आहे. शुक्रवारी सकाळी पावणेअकरा वाजण्याच्या सुमारास जाबीर अली हा मालट्रक (क्र.एमपी-४६/एच-०५०१) घेऊन अक्कलकोट होऊन सोलापूरच्या दिशेने येत होता. मालट्रक मल्लिकार्जुन नगर येथे आला असता समोरून येणाऱ्या मोहसीन मेहबूब पठाण (वय ३५, रा. भुलाबाई चौक, रविवार पेठ) या मोटरसायकलस्वाराला वाचवण्यासाठी चालकाने ट्रक दुसऱ्या दिशेला घातला. मात्र त्यात मोटरसायकलला धडकून तिथे रस्त्याच्या कडेला भाजी विक्री करणाऱ्या जुलेखा मुर्तुज शेख (वय ५०, रा.पडगाजी नगर, अक्कलकोट रोड) या महिलेला धडक दिली. या अपघातामध्ये दोघांचाही मृत्यू झाला. याप्रकरणी मुर्तुज कासीम शेख (वय ५२) यांनी फिर्याद दिली असून, तपास सहायक पोलीस निरीक्षक खांडेकर करीत आहेत.