वीज पडल्याने गायीबरोबर पक्ष्याचा मृत्यू; मंद्रुप येथील साठेवस्तीवर घटना

सोलापूर लोकमत ब्रेकींग

सोलापूर: दक्षिण सोलापूर तालुक्यातील मंद्रूप येथे अवकाळी पावसाच्यावेळेस वीज पडल्याने गाईबरोबर झाडात बसलेल्या एक पक्षी मृत्यू झाल्याची घटना बुधवारी सायंकाळी घडली. 

 मंद्रूप परिसरात गुरुवारी सायंकाळी चार वाजेच्या सुमारास वादळी वाऱ्यासह जोरदार अवकाळी पाऊस झाला .यावेळी जोरदार विजांचा कडकडाट झाला. साठेवस्ती येथे राहणारे आबा मधुकर साठे यांच्या शेतातील आपट्याच्या झाडावर यावेळी वीज कोसळली. यात झाडाखाली बांधलेली गाभण गाय मरण पावली, तसेच झाडावर घरट्यात बसलेल्या व्हल्ला या पक्षाचाही मृत्यू झाल्याचे दिसून आले.

विजेचा कडकडाटानंतर वीज कुठे पडली म्हणून शेतकरी बाहेर आले. त्यावेळी त्यांना आपट्याच्या झाडाखाली बांधलेली गाय मरण पावल्याचे निदर्शनास आले. उपस्थित शेतकऱ्यांनी वीज कोठे पडली हे तपासले असता आपट्याच्या झाडात घरट्यात बसलेला पक्षीही मरण पावल्याचे दिसून आले. मंद्रूप परिसरात वीजा पडण्याचे प्रमाण वाढले आहे. काही महिन्यापूर्वी कुरघोट रस्त्यावरील पत्राशेडवर वीज पडली होती.