बनावट चावीने पळविला ट्रक

महुद येथील घटना; सांगोला पोलिसांकडून तपास सुरू

सांगोला : अज्ञात चोरट्याने बनावट चावीने १० लाख किमतीचा मालट्रक चालू करून पळवून नेल्याची घटना सोमवारी सकाळी पावणेआठच्या सुमारास महुद बु॥ (ता. सांगोला) येथील महुद-दिघंची रोडवरील वर्दळीच्या ठिकाणी घडली. येथील श्रीमती कुसुम नंदकुमार विभुते यांच्या मालकीचा (क्र. एम. एच. ४५/ 0४९२) हा मालट्रक असून काल रविवारी नेहमीप्रमाणे महुद-दिघंची रोडवरील शिवाजी विभुते यांच्या गाळ्यासमोर रिकामा मालट्रक उभा केला होता. सोमवारी सकाळी सहाच्या सुमारास कुसुम विभुते यांचा मुलगा बसवेश्वर विभुते विहिरीवर आंघोळीला जात असताना मालट्रक नेहमीच्या ठिकाणी उभा केला होता. विहिरीवरुन आंघोळ करून घरी परत येत असताना उभ्या केलेल्या ठिकाणचा मालट्रक गायब असल्याचे दिसून आले. या दरम्यान बसवेश्वर विभुते यांनी चौकशी केली असता सदरचा मालट्रक पंढरपूरच्या दिशेने गेल्याचे पाहिले असल्याचे सांगण्यात आले. घडल्या प्रकाराची माहिती बसवेश्वर विभुते यांनी सांगोला पोलिसांना दिली. यावेळी पो. नि. दयानंद गावडे यांनी वायरलेसवरुन मालट्रक पळवून नेल्याची माहिती वरिष्ठ कार्यालयाकडे कळविली. सोमवारी दिवसभर पोलिसासह विभुते कुटुंबीय, नातेवाईक, मित्र परिवार चोरीस गेलेल्या मालट्रकचा सर्वत्र शोध घेत होते; मात्र रात्री उशिरापर्यंत ट्रकचा तपास लागला नाही.

-------------------------

चारचाकी वाहन चोरीची दुसरी घटना

येथील महादेव आण्णा लवटे यांचे पंढरपूर रोडवरील नव्या पेठेत भुसार मालाचे दुकान असून दुकानापुढे जीप उभा करून शेतात गेले होते. अज्ञात चोरट्याने मध्यरात्रीची संधी साधून जीप चोरुन नेली होती. या चोरीचा तपास अद्याप सांगोला पोलिसाकडून लागला नाही. तोच पुन्हा महुद बु॥ येथून व्यापार्‍याचा मालट्रक पळवून नेल्याची घटना घडल्याने नागरिकांतून उलटसुलट चर्चा सुरु आहे.