कंटेनरच्या धडकेत दुचाकीवरील शेतकरी ठार

सांगोला : भरधाव कंटेनरने दुचाकीला पाठीमागून जोराची धडक दिल्याने रस्त्यावर पडलेल्या शेतकऱ्याच्या डोक्यावरून कंटेनरची चाके गेल्याने तो जागीच ठार झाला. हा अपघात गुरुवार, १७ जून रोजी सायंकाळी सव्वाचारच्या सुमारास सांगोला - महूद रोडवरील पाटील वस्तीजवळ घडला. तुकाराम मारुती जाधव (वय-४६, रा. वाकीशिवणे, ता. सांगोला) असे मृताचे नाव आहे.

वाकी शिवणे येथील शेतकरी तुकाराम मारुती जाधव हे गुरुवारी सकाळी एमएच ४५ - यू २७९३ या दुचाकीवरून आंबे विक्रीसाठी महूदला गेले होते. ते दुचाकीवरून परत वाकीशिवणेच्या दिशेने घराकडे निघाले होते. त्याचवेळी भिवंडीकडून महूदमार्गे चेन्नईकडे भरधाव निघालेल्या (एमएच ४३ - वाय ८६०४) या कंटेनर चालकाने सांगोला - महूद रोडवरील पाटील वस्तीजवळ दुचाकीला धडक दिली. यात शेतकरी तुकाराम जाधव यांच्या डोक्यावरून कंटेनर गेल्याने ते जागीच ठार झाले.

अपघातानंतर चालक कंटेनर सोडून पळून गेला. पोलीस नाईक अभिजित मोहोळकर यांनी घटनास्थळी पंचनामा केला. रात्री उशिरापर्यंत पोलीस ठाण्यात नोंद झाली नव्हती.

----