अतिक्रमण काढण्यासाठी कुर्डूवाडी पंचायत समितीसमोर उपोषण

: टेंभुर्णी (ता.माढा) येथील कसबा वाडा हद्दीत ग्रामपंचायत मालकीच्या जागेत काही जणांनी केलेले अतिक्रमण काढण्यासाठी तक्रारकर्ते नीलेश गायकवाड व नीलेश फुले यांनी बुधवारी एक दिवसीय लाक्षणिक उपोषण केले.

यावेळी टेंभुर्णी विभागाचे ग्रामपंचायत विस्तार अधिकारी भारत रेपाळ यांनी त्यांना संबंधित अतिक्रमण करणाऱ्या व्यक्तींवर पोलिसात गुन्हा दाखल करीत असल्याचे फोनद्वारे कळविल्यानंतर त्या दोघांनी उपोषण दुपारी मागे घेतले.

बुधवारी सकाळी ११ वाजता टेंभुर्णी येथील कसबा वाडा हद्दीत काही व्यक्तीने ग्रामपंचायतच्या जागेमध्ये अतिक्रमण केले असल्याचे पंचायत समिती प्रशासनाला वारंवार कळवून देखील कारवाई न झाल्याने पंचायत समितीच्या कार्यालयासमोरच उपोषण करण्यात आले.

यावेळी पंचायत समितीला सुटी असल्याने त्यांचे निवेदन येथील सुरक्षारक्षक पोपट बागल यांनी घेतले. गेल्या दोन वर्षापासून आम्ही प्रशासनाकडे पाठपुरावा करत असून देखील टेंभुर्णी ग्रामपंचायत व वरिष्ठ याकडे दुर्लक्ष करीत आहे. वरिष्ठ प्रशासन आतून अनास्था दाखवत असल्याचे तक्रारकर्ते यांचे म्हणणे आहे.

१४कुर्डूवाडी-उपोषण

कुर्डूवाडी पंचायत समितीच्यासमोर टेंभुर्णीतील कसबा वाडा येथील अतिक्रमण काढण्यासाठी उपोषण करताना तक्रारकर्ते.