बार्शीतील पाच लघू प्रकल्प पूर्णत: भरले

बार्शी : यंदा पावसाळ्याची सुरुवात चांगली झाली असून, बार्शी तालुक्यात मागील दोन दिवसांपासून पडत असलेल्या दमदार पावसामुळे नदी, नाले, ओढे भरून वाहू लागले आहेत. तालुक्यातील सर्व सिमेंट बंधारे हे पूर्ण क्षमतेने भरले आहेत. पाझर तलावात सरासरी शंभर टक्के पाणीसाठा झाला आहे. मध्यम व लघू प्रकल्पातही सरासरी ८० टक्के पाणीसाठा झाला आहे.

तालुक्यात चार मध्यम प्रकल्प व १५ लघू प्रकल्पाबरोबरच २३० पाझर तलाव, ११८ के.टी. वेअर, सहा गावतलाव, जवळपास ६०० सिमेंट बंधारे आहेत. यांची पाणी साठवण क्षमता सात टीएमसी एवढी आहे. या प्रकल्पावर २४ हजार हेक्टर बागायती क्षेत्र अवलंबून आहे.

जिल्ह्यात बार्शी तालुक्यात सर्वाधिक १५ लघू तर चार मध्यम प्रकल्प आहेत. या प्रकल्पावर तालुक्यातील अनेक गावांच्या पाणीपुरवठ्याच्या योजना व बागायती शेती अवलंबून आहेत. दोन वर्षे चांगला पाऊस झाल्याने, सर्व प्रकल्प पूर्ण क्षमतेने भरले होते.

----

मध्यम व लघू प्रकल्पाची साठवण क्षमता

हिंगणी - १६०७-५६ टक्के, जवळगाव- १२३३१०- ३२.६९ टक्के, ढाळेपिंपळगाव- ४१७१८-४१.२३ टक्के, तर लघू प्रकल्पामध्ये पाथरी- ४१९़४७-५९.३२ टक्के, बाभुळगाव- २२६-१० टक्के, कोरेगाव- ८५५-१०० टक्के, चारे- ५३४- १०० टक्के, वालवड- ४२४-१०० टक्के, काटेगाव- ४१९-१०० टक्के, कळंबवाडी- ९५१३- १०० टक्के, ममदापूर- ८९२५-३४.५२ टक्के, गोरमाळे- ६१६०- ९०.२२ टक्के, कारी- ६०१०- ३६.६५ टक्के, तावडी- ४४८- ४४.३५, वैराग- ५१४०- ३३.१० टक्के याप्रमाणे पाणीसाठा झाला आहे.

---

सर्व बंधारे, पाझर तलाव तुडुंब

तालुक्यात लघू पाटबंधारे, कृषी विभाग व जलसंधारण विभाग यांचे पाझर तलाव व सिमेंट बंधारे व कोल्हापूर पद्धतीचे बंधारे आहेत. लघू पाटबंधारे यांचे ११३ पाझर तलाव व कोल्हापूर पद्धतीचे ११० बंधारे आहेत. त्यातील ६५ बंधाऱ्याला पडदी टाकून सिमेंट बंधाऱ्यात रूपांतरित केले आहे. २८३ सिमेंट बंधारे आहेत. हे सर्व बंधारे भरले आहेत. तलावात ९० टक्के पाणी जमा झाले आहे. जलसंधारण विभागाचे ११७ पाझर तलाव आहेत, त्यात ही ९० टक्के पाणी जमा झाले आहे.