कार आडवी आल्यानं ब्रेक दाबला; रिक्षा पलटी होऊन चौघे प्रवासी जखमी

विडी घरकूल येथील घटना : जखमींमध्ये तिघा वृद्धांचा समावेश.

विलास जळकोटकर, सोलापर : मुळेगाव रोड येथून शहरातील कौंतम चौकाकडे प्रवासी घेऊन येणाऱ्या येणाऱ्या रिक्षाच्या समोर कार आडवी आली. अचानक ब्रेक दाबला गेल्यानं रिक्षा पलटी होऊन चार प्रवासी जखमी झाले. गुरुवारी सकाळी १०:३० च्या सुमारास विडी घरकूलजवळील चंदन काट्याजवळ हा अपघात झाला. जखमींवर शासकीय रुग्णालयात उपचार सुरु आहेत.

अब्दुल रशिद बागवान (वय- ६८, रा. बागवान नगर, सोलापूर), मुमताब अब्दुल रशिद बागवान (वय- ६६) गोपाळ गंगाराम सदाफुले (वय ७६, गणेश नगर, सोलापूर), जिलानी सैपनसाब शेख (वय- ४३, राघवेंद्र नगर, सोलापूर) अशी जखमींची नावे आहेत. जखमींमध्ये तिघा वृद्धांचा समावेश आहे.
यातील जखमी असलेले चौघे गुरुवारी सकाळी १०:३० च्या सुमारास मुळेगाव रोड येथील विविध नगरात राहणारे प्रवासी शहरातील कोंतम चौकाकडे कामानिमित्त रिक्षामधून येत होते. प्रवाशांनी भरलेली रिक्षा मुळेगाव रोडवरील चंदन काट्याजवळ आली असताना अचानक समोर कार आडवी आली. अपघातापासून रोखण्यासाठी रिक्षाचालकाने अचानक ब्रेक दाखला. यामुळे रिक्षा पलटी होऊन चौघांना डोक्यास, हातापायासह सर्वांगास मार लागला. त्यांना तातडीने शासकीय रुग्णालयात उपचारासाठी दाखल केले. चौघांवर उपचार सुरु आहेत. सर्वजण शुद्धीवर असल्याचे डॉक्टरांनी सांगितले.