जीप टँकरवर धडकून चारजण मृत्युमुखी

अचानक समोर आलेल्या दुचाकीस्वारास वाचविण्याच्या प्रयत्नात चालकाचा ताबा सुटल्याने बोलेरो जीप रस्त्याकडेला उभ्या राहिलेल्या टँकरला धडकल्याने

सोलापूर : अचानक समोर आलेल्या दुचाकीस्वारास वाचविण्याच्या प्रयत्नात चालकाचा ताबा सुटल्याने बोलेरो जीप रस्त्याकडेला उभ्या राहिलेल्या टँकरला धडकल्याने चार जण जागीच मृत्युमुखी पडले तर एक जण गंभीर जखमी झाला. हा अपघात सोलापूर- पुणे महामार्गावर पाकणी फाट्यावर शुक्रवारी सकाळी दहाच्या सुमारास घडली़
प्रियंका अलोने (२२), नारायण अलोने (६५), सुलोचना अलोने (५५), गोकुळ अलोने (४८) अशी मृतांची नावे आहेत. जखमी ओंकार गोकुळ अलोने (२५) याच्यावर खासगी रूग्णालयात उपचार सुरू आहेत़ नारायण व सुलोचना अलोने हे दोघे आजारी होते़ त्यांना उपचारासाठी जिपमधून पुण्याला घेऊन चालले होते. पाकणी फाट्याजवळ दुभाजकामधून अचानक दुचाकीस्वारास आल्याने त्याला वाचविण्याचा प्रयत्न करताना जीपचालकाचा ताबा सुटला आणि जीप रस्त्यावर उभ्या असलेल्या टँकरवर पाठिमागून धडकली़ अपघातानंतर पाकणी फाट्यावरील नागरिकांनी अपघातातील मृतांना व जखमींना बाहेर काढण्यासाठी मदत केली़ अपघाताची माहिती समजताच तालुका पोलीस ठाण्याचे पोलीस निरीक्षक रामकृष्ण भोसले तातडीने घटनास्थळी आले. त्यांनी जखमी ओंकारला तातडीने रुग्णालयात हलविले.( प्रतिनिधी)